O delegado do Goberno confirma o interese de varias empresas en Alcoa
Javier Losada recorda que a posible venda das plantas de Avilés e A Coruña é unha decisión que debe valorar a propia compañía.
- Unanimidade no Parlamento para esixir a Alcoa que retire o expediente de extinción de emprego
- A Xunta insiste en responsabilizar ao Goberno central do peche de Alcoa
Por E.P. | VIGO | 24/10/2018 | Actualizada ás 16:49
O delegado do Goberno en Galicia, Javier Losada, confirmou este mércores que varias empresas contactaron co Executivo para interesarse pola situación de Alcoa, e subliñou que, en todo caso, a posible venda das plantas de Avilés e A Coruña é unha decisión que debe valorar a propia empresa.
Durante unha visita á Zona Franca de Vigo, Javier Losada explicou que, segundo trasladou o Ministerio de Industria, "empresas puxéronse en contacto co Goberno para coñecer a situación" de Alcoa. "Aínda que é certo que transmitimos isto a Alcoa, será a empresa a que deberá valorar", matizou, respecto dunha posible venda das plantas ameazadas de peche.
Javier Losada recalcou que, a pesar da "cerrazón" da empresa na "dura" reunión deste martes, o Goberno seguirá "traballando", en unión cos traballadores e outras institucións (Xunta de Galicia e Principado de Asturias) para lograr o obxectivo de manter a produción e o emprego.
A este respecto, o delegado do Goberno expresou a súa esperanza de que Alcoa "se aveña a dialogar" e estableza "un tempo de espera duns meses" para analizar a evolución das factorías, elaborar un plan de empresa e de investimentos e evitar o ERE e o peche, mentres segue mantendo a actividade.
Por outra banda, proclamou que o Goberno de España aproveitará "cada minuto" do próximos dez días —prazo que deu a empresa para presentar o expediente de regulación de emprego— para "buscar unha saída" que garanta a actividade e o emprego nas plantas galega e asturiana, para o que instou a "manter a unidade" entre traballadores e administracións, na busca dese obxectivo común.
Por outra banda, Javier Losada tamén confirmou que o Goberno mantén contactos "con outros niveis da empresa", ademais dos responsables de Alcoa en España, para tentar que os dirixentes da multinacional "recapaciten" e reconsideren a súa decisión acerca dunhas fábricas que forman parte dun "sector estratéxico". "O Goberno está comprometido, seguiremos dialogando até o final", aseverou.
