Investigan a dous mozos por roubos en igrexas e bares no sur de Pontevedra

Dous mozos, de 20 e 23 anos, están a ser investigados penalmente pola Garda Civil como presuntos autores de sete delitos de roubo con forza cometidos durante os últimos meses en varias igrexas e distintos bares na comarca do Condado e nos municipios de Fornelos de Montes e Pazos de Borbén, na comarca de Vigo.

Por mor das investigacións levadas a cabo por efectivos do Posto Principal da Garda Civil de Ponteareas, púidose esclarecer a presunta autoría de tres roubos en igrexas, outros tres en bares e un de gasóleo en varias retroexcavadoras.

O avistamento dun vehículo nas inmediacións dunha das igrexas nas que se roubou foi a principal liña de investigación. A pesar de que o seu propietario non tiña antecedentes policiais, enseguida se puido constatar a súa relación con outro mozo con antecedentes por varios roubos en vivendas.

As pescudas completáronse coas imaxes das cámaras de seguridade doutro dos establecementos afectados e, finalmente, púidose concretar a suposta participación de ambos en sete roubos con forza, cometidos durante os meses de agosto e setembro deste mesmo ano.

Os lugares afectados por estes feitos son a capela da Lomba- Fozara, a igrexa de San  Mateo de Toutón, ambas no municipio de Ponteareas; e a igrexa de Xunqueiras (Pazos de Borbén). Ademais, atribúenselles os roubos no bar de  Padróns (Ponteareas) e nos chiringuitos das praias fluviais da Freixa- Bugarín (Ponteareas) e  Do Val, en Mondariz.

Finalmente, acúsaselles do roubo duns cen litros de gasóleo en varias máquinas  retroexcavadoras estacionadas na parroquia de Estacas, do municipio de Fornelos de Montes.