Unha saída de vía na A-55 en Mos sáldase con tres feridos, un deles un bebé

Tres persoas, unha delas un bebé, tiveron que ser trasladadas ao hospital na madrugada deste venres tras sufrir un accidente de tráfico na A-55 ao seu paso por Mos (Pontevedra).

Segundo a información do CIAE 112-Galicia, o suceso ocorreu pasada a medianoite na A-55 ao seu paso por Mos, en sentido O Porriño, cando o vehículo no que viaxaban as tres persoas se saiu da vía.

Até a zona foron mobilizados efectivos da Garda Civil de Tráfico e da Policía Local, así como os Bombeiros do Porriño e Protección Civil de Mos. Aínda que en principio o seu estado non revestía gravidade, os tres ocupantes foron trasladados polo 061 até o Hospital Álvaro Cunqueiro.