A finalista de Operación Triunfo Sabela Ramil dará a saída da IX San Silvestre Coruña

A finalista de "Operación Triunfo" Sabela Ramil será a encargada de dar a saída da IX San Silvestre Coruña, que arrincará este 31 de decembro na cidade, ás 17,00 horas. A cantante das Pontes estará no Obelisco cos 4.500 corredores para entoar, como é habitual, o popular "O Miudiño" antes de empezar a competición. A San Silvestre Coruña, que organiza o Club Rialto e na que colabora o Concello da Coruña, conta este ano con varias novidades.

As principais son o número de corredores, que se incrementa en 500 con respecto a 2017, e a idade de participación, que se rebaixou ata os 11 anos. Entre os inscritos hai case medio centenar de atletas desta idade e son máis de 250 os menores de 15 anos.

Os maiores da proba, os que superan os 60 anos, son ao redor dun centenar. Os máis veteranos entre os que sairán do Obelisco son Enrique e José Luís, de 78 anos, na categoría masculina, e Pilar, de 75, na feminina, indica a organización. Nesta ocasión, engadiuse tamén a posibilidade de competir como equipo de empresa, categoría que se engade ás oito xa existentes por idades e ás dúas ao mellor disfrace, tanto colectivo como individual. A competición terá un percorrido urbano que partirá do Obelisco e chegará a María Pita, de forma similar ás últimas edicións, cunha distancia de aproximadamente 7 quilómetros.