Morren cinco porcos calcinados nunha granxa das Pontes

Un incendio que tivo lugar na mañá deste venres nunha nave de gando porcino no municipio das Pontes de García Rodríguez (A Coruña), debido a un cable eléctrico, causou "danos menores" no interior da explotación e a morte de cinco porcos.

Así o relatou o 112 Galicia, que concretou que foi un cable eléctrico o que ardeu e, por mor dos efectos do lume, pereceron cinco porcos.

Os feitos ocorreron no lugar do Gallel, ao fío das 10,00 horas deste venres. O 112 Galicia tivo constancia do incendio a través do dono da explotación, tras o que requiriu a intervención dos Bombeiros do Eume, da Garda Civil, da Policía Local, de Protección Civil e de Urxencias Sanitarias.

Unha vez na nave, os membros do Servizo de Prevención, Extinción de Incendios e Salvamento do Eume comprobaron que o lume xa fora sufocado polo dono da explotación e un empregado, polo que ventilaron a instalación e regresaron á súa base.