Os acusados da 'Trucarro', a un paso de ser absoltos tras quedar en nada o xuízo

Todos os acusados da operación 'Trucarro' están a un paso de ser absoltos tras quedar en nada o xuízo celebrado na Audiencia Provincial da Coruña (na sede en Santiago). O caso investigaba a manipulación da quilometraxe de vehículos de segunda man que posteriormente eran postos á venda.

O xuízo quedou visto para sentenza este venres despois de que o pasado mércores a Sala declarase nulas, por un defecto procedimental, as escoitas das que deriva todo o caso que se remonta a 2008.

"Sen as escoitas non podemos celebrar o xuízo", resumiu o fiscal do caso, Jorge Fernández de Aránguiz, quen achegou o conxunto de autos habilitantes polo xulgado para as escoitas co obxectivo de que fosen admitidas nesta sesión. Con todo, o presidente da Sección Sexta da Audiencia Provincial da Coruña, Ángel Pantín, deixoulle claro que a súa nulidade "está acordada e non hai máis que dicir", polo que "non hai posibilidade de reconsideralo".

Chegados a este punto, o xuíz afirmou que se ía a seguir co xuízo ata emitir sentenza resolutoria, polo que pediu ás acusacións se podían achegar algunha proba non contaminada polas escoitas. O fiscal insistiu en que non é posible, aínda que a acusación particular contra Nené Barral -exalcalde de Ribadumia que recoñeceu en 2016 defraudar a Facenda- pediu a súa declaración e a do principal implicado na causa, J.G., o dono dun taller do Milladoiro (Ames).

Deste xeito, J.G. acolleuse ao seu dereito a non declarar, mentres o único acusado que tomou a palabra foi Nené Barral -foi dono dun taller en Vilagarcía que supostamente vendeu un coche trucado ao cliente desta acusación particular- para só contestar a preguntas da súa avogada. Pretendeu declarar a súa inocencia e negar calquera implicación nos feitos.

Finalmente, o xuízo quedou visto para sentenza tras afirmar o xuíz que "non é moi difícil saber" cal será o resultado da sentenza, debido á inexistencia de probas achegadas durante o xuízo oral.