Eliminar o tabaco permitiría reducir un 30% os casos de cancro, que aumentaron por terceiro ano en Galicia

O número de casos de cancro en Galicia mantén a dinámica de crecemento, xa que en 2018 se rexistraron 18.905 casos, case 200 máis que o ano anterior e, por terceiro ano consecutivo, se incrementou a mortalidade, con 8.511 defuncións. Os expertos opinan que, se se conseguise eliminar o tabaco, o número de tumores se reduciría un 30 por cento nas próximas xeracións.

Coincidindo coa conmemoración do Día Internacional contra o Cancro, este luns, 4 de febreiro, a Asociación Española Contra o Cancro (AECC) actualizou os datos sobre incidencia, prevalencia e mortalidade como consecuencia desta enfermidade.

O coordinador da AECC na provincia da Coruña, Marcos Calvo, apuntou que "é unha enfermidade que vai a máis". Pola súa banda, o xefe de servizo de Oncoloxía Médica no Hospital Clínico Universitario de Santiago de Compostela (CHUS), Rafael López, atribuíu estes incrementos a unha "maior esperanza de vida e tamén ao tabaco".

IDADE, TABACO E SOBREPESO, FACTORES DE RISCO

O xefe de servizo de Oncoloxía Médica do CHUS asegurou que a principal causa de cancro é a idade, xa que "ao incrementar a esperanza de vida, aumenta a incidencia". Non en balde, segundo os datos da AECC, o tramo de idade no que máis casos se detectaron en Galicia é o de persoas maiores de 75 anos, con máis de 20.674 casos de prevalencia —pacientes de cancro aos que se lles diagnosticou no últimos cinco anos—.

Ademais, López advertiu do "incremento do consumo de tabaco", que a pesar de que "baixa en homes, está a aumentar en mulleres". López lamenta que "se volveu ao mesmo nivel que cando se impulsou a lei". "Fracasamos", reflexionou.

Este médico apuntou que "non se convenceu á poboación" e engadiu a "relaxación da sociedade". Ademais, criticou que "houbo moi poucas multas por incumprimento da lei" e que "non se avanzou" como si se fixo "en países do norte nos que a lei se ha ido endurecendo e onde o tabaco ten prezos moi elevados".

Nesta liña, avogou por "ser proactivos", destacou a necesidade de "tomar medidas na educación e incidir nos colexios" e sinalou que "eliminar o tabaco diminuiría un 30 por cento o número de tumores nas próximas xeracións".

Ademais do tabaco e da idade, López destacou a importancia da "boa alimentación, do peso ideal e do exercicio". O xefe de servizo apoiouse en datos da Asociación Americana Contra o Cancro que evidencian que o sobrepeso é, despois da idade e o tabaco, un dos principais factores de risco.

EN GALICIA REXISTRÁRONSE 18.905 CASOS EN 2018

Segundo os datos do Observatorio da AECC, no último ano en España rexistráronse 270.363 novos casos de cancro (155.971 homes e 114.392 mulleres). Na clasificación autonómica, Galicia ocupa a quinta posición, con 18.905 casos (10.935 homes e 7.970 mulleres).

A Coruña foi en 2018 a provincia cun maior número de incidencias (7.684), por diante de Pontevedra (6.007), Lugo (2.649) e Ourense (2.564).

En canto ao tipo de cancro, o máis habitual o pasado ano foi o colorrectal, con 2.664 pacientes. A continuación están o de mama (2.167), próstata (2.167), pulmón (1.911) e outros de pel (1.659), segundo os datos da AECC.

O pasado ano morreron en toda España 110.753 enfermos de cancro, 8.511 en Galicia. Por terceiro ano consecutivo, aumentaron as defuncións en territorio galego, tras as 8.438 que se rexistraron en 2017. O cancro de pulmón foi o de maior mortalidade, con 1.581 falecidos.

O Observatorio tamén elabora unha proxección sobre a evolución da mortalidade nas próximas décadas, baseándose nos datos de mortalidade dos diferentes anos provenientes de Globocan-Tomorrow. Segundo esta proxección, a evolución da mortalidade crecería en Galicia desde os 8.492 casos previstos en 2020 ata os 11.144 do ano 2040.

Son uns datos cos que coincide Marcos Calvo, que asegurou que "a enfermidade vai a máis" e que sinalou o "incremento da incidencia" e asegurou que "é unha enfermidade que vai a máis".

No entanto, tamén subliñou que "aumentou a supervivencia" debido a que "melloran os tratamentos" que permiten que haxa unha "maior posibilidade de cura ou de que a enfermidade se cronifique". Así, cifrou nun "60 por cento a porcentaxe de pacientes con resposta positiva".