Medio Rural segue tentando buscar unha solución de viabilidade para o sector lácteo galego

O conselleiro de Medio Rural, José González, anunciou o inicio dun plan de pastos en extensivo, que servirá como "mecanismo de prevención" contra o lume. A primeira das experiencias realízase en 300 hectáreas no municipio ourensán de Cualedro, afectado ano tras ano os incendios.

En declaracións previas á reunión deste luns do Consello Agrario celebrado en Boqueixón (A Coruña), José González explicou que unha das cuestións a abordar son as recomendacións saídas da comisión parlamentaria de prevención de incendios e reforma forestal, na que os pastos en extensivo serán unha ferramenta "importante".

Así mesmo, apostarase pola mobilización de terra agraria e a súa posta en valor para reducir o risco de incendio, unido ao permiso da Xunta para poder pastorear en determinadas excepcións en terreos queimados. A intención de José González é que o Consello Agrario, órgano de interlocución con organizacións agrarias, reúnase con "maior" periodicidade.

PLAN PARA O LÁCTEO

Entre outros temas, neste encontro tamén se abordou a estratexia de dinamización do sector lácteo, que foi anunciada a semana pasada polo conselleiro de Medio Rural. José González busca "trasladar unha mensaxe positiva" de "forza" e unión, no que "estean todos os axentes do sector" para falar de "máis cousas" que do prezo, como dos custos de produción e as marxes de beneficio.

O titular do departamento fixo a comparativa das cifras do sector lácteo en 2018 con dous anos antes, non con 2017. Así, apunta que o prezo pago aos gandeiros, que non chega aos 32 céntimos por litro, é un 6,4% maior que en 2016. Tamén destaca unha facturación de 851 millóns de euros, un 16% máis que en 2016, e un incremento no volume de litros do 5% respecto de dous anos antes. Por outra banda, no Consello Agrario tratouse a creación dun grupo de traballo multidisciplinar que defenda as peculiaridades de Galicia de face á futura Política Agrícola Común (PAC).

Finalmente, púxose sobre a mesa a orde de reestruturación de viñedos publicada o pasado venres no DOG, que inclúen unha baixada do número de hectáreas máximo con axudas (ata 10 hectáreas). Os viticultores poderán facer plantacións cos seus propios medios e non terán que contratar empresas, o que "era unha demanda do sector".

"CHEGA TARDE"

Pola súa banda, o secretario xeral de Unións Agrarias, Roberto García, realizou tamén declaracións antes da reunión. Valora o "cambio" levado a cabo polo conselleiro para que o Consello Agrario teña un maior "papel activo". Respecto das medidas antincendios, García avoga pola procura dun "aproveitamento económico" do monte, cun aumento da base territorial para usos gandeiros. Ademais, pide que a Administración actúe contra as plantacións ilegais de eucaliptos en terreos agrarios "sen incitar a que teña que ser unha denuncia dun veciño contra outro veciño".

No tocante á creación dun novo plan estratéxico do leite, o responsable deste sindicato agrario critica que "chega tarde", xa que "este goberno anunciou no pasado dúas veces" esta iniciativa coa anterior conselleira "sen que a día de hoxe haxa ningún documento". Aquí, urxe a pór medidas de face ao 1 de abril para a negociación dos contratos do próximo ano, xa que Galicia conta cos prezos "máis baixos da UE" e "non hai razón de mercado" nun contexto de crecemento xeneralizado en Europa. Tacha de "realmente insultante" que cheguen propostas de contratos ao campo con "baixada de prezo".

Para a redución de custos, Roberto García opina que é fundamental a incorporación de base territorial abandonada. Reflexiona acerca de que o 60 por cento de gastos dunha explotación son para alimentación, e diso máis dun 40% destínase a forraxe e alimento comprado fóra. Por iso, pregúntase como é posible que con 600.000 hectáreas abandonadas en Galicia as explotacións teñan que comprar forraxe.

Reunión do Consello Agrario. UNIÓNS AGRARIAS | Fonte: Europa Press