Críticas á TVG por non emitir a Gala dos Premios de Teatro María Casares

'Commedia', de Contraproducións, e 'Invisibles', de Redrum Teatro, foron os espectáculos máis galardoados nos XXIII Premios de Teatro María Casares, entregados unha gala que se celebrou a última hora da tarde do xoves no Teatro Rosalía de Castro. Un acto no que tamén se criticou a decisión da TVG de non emitir o evento.

'Anatomía dunha serea', de Iria Pinheiro; 'O servidor de dous amos' de Talía Teatro; e 'Casa O Rei', de Ibuprofeno, conseguiron dous premios. Pola súa banda, 'Divinas Palabras Revolution', do Centro Dramático Galego e 'Patapatúm', de Elefante Elegante, lograron un premio.

Un total de 12 espectáculos aspiraban a facerse con algún dos catorce galardóns nos que se dividen estes premios, organizados pola a Asociación de Actores e Actrices de Galicia (AAAG), coa colaboración da Consellería de Cultura e Turismo, a través dá Axencia Galega das Industrias Culturais (Agadic), e institucións como o Concello e a Deputación da Coruña.

Nunha noite cos galardóns moi repartidos, sete espectáculos gañaron algún premio. 'Commedia', de Contraproducións, conseguiu tres galardóns: espectáculo, actor secundario (Marcos Orsi) e vestiario (Suso Montero).

OUTROS GALARDOADOS

Pola súa banda, 'Invisibles', de Redrum Teatro, levou outro tres premios: dirección (Marián Bañobre), iluminación (Laura Iturralde) e adaptación-tradución (Santiago Coregoso e Marián Bañobre).

'O servidor de dous amos', de Talía Teatro, logrou outros dous galardóns: maquillaxe (Martina Cambeiro) e actriz secundaria (Marta Lado). 'Casa O Rei', de Ibuprofeno, conseguiu tamén outros dous: actor protagonista (Miguel Borines) e música orixinal (Caxade).

'Anatomía dunha serea', de Iria Pinheiro, fíxose, á súa vez, con outros dous premios: actriz protagonista (Iria Pinheiro) e mellor texto orixinal (Iria Pinheiro e María Lado).

Finalmente, 'Divinas palabras Revolution', do Centro Dramático Galego, levou un premio María Casares: escenografía (Suso Montero). 'Patapatúm', de Elefante Elegante, tamén fíxose con outro, o de mellor espectáculo infantil.

PREMIO DE HONRA

A gala estivo dirixida, nesta edición, por Juanillo Esteban e Carlos Sante, cunha proposta na que se trasladou ao público á época do Imperio Romano mediante un espectáculo no que se mesturou o teatro con técnicas do novo circo.

Durante a mesma, o actor e dramaturgo Carlos Santiago leu o manifesto galego do Día Mundial do Teatro. Ademais, as Aulas de Teatro Universitario de Santiago e Ourense recibiron o Premio de Honra Marisa Soto.

Entre as máis de 500 persoas que acudiron á gala, atopábanse, entre outros, o alcalde herculino, Xulio Ferreiro; o director da Axencia Galega das Industrias Culturais (Agadic), Jacobo Sutil; a actriz Marisa Paredes e Chema Prado, antigo director da Filmoteca Nacional.

A gala non foi retransmitida pola TVG por decisión da organización ante a negativa do ente público, segundo os organizadores, de negociar unha mellora na retransmisión. Así o explicou a vicepresidenta da AAAG, Mabel Rivera, que argumentou que a intención da asociación era que se emitise "nun horario razoable e na primeira canle" do ente público galego.

"Nós somos os rostros, as voces, o talento nunha palabra, do audiovisual galego", reivindicou no seu discurso para lamentar que non se atendesen as súas demandas a este respecto.

Commedia, obra de teatro de Contraproducións