Traballadores do hospital de Verín convocan un peche de 24 horas no centro este mércores
"Non se pode seguir con esta situación, somos traballadores, non escravos!", aseveran no comunicado os representantes do persoal do hospital de Verín.
Por E.P. | SANTIAGO DE COMPOSTELA | 24/04/2019 | Actualizada ás 09:33
Os representantes sindicais dos traballadores do hospital de Verín (Ourense) convocaron un peche de 24 horas este mércores despois de que, tras un mes de mobilizacións, a dirección non dese " resposta" ás súas demandas.
Nun comunicado subscrito polos sindicatos CIG, CC.OO., UXT, CSIF, Prosagap, SAE e Satse; os traballadores anuncian a acción e avanzan que non descartan "todo tipo de mobilizacións" se a dirección non atende as súas reivindicacións.
"A dirección segue facendo caso omiso da situación que padece o hospital", denuncian os sindicatos, que consideran "unha falta de respecto" aos traballadores e os pacientes do centro, que "padecen unha diminución na calidade da atención debido aos recortes da xerencia".
"Non se pode seguir con esta situación, somos traballadores, non escravos!", aseveran no comunicado os representantes do persoal do hospital de Verín.
