Galicia asistiu en 2018 a 690 vítimas de trata con fins de explotación sexual
Os Centros de Información á Muller recibiron máis de 68.000 consultas, a maior parte reclamando atención psicolóxica ou xurídica e máis do 50% procedentes da provincia da Coruña.
Por Europa Press / Redacción | Santiago de Compostela | 09/05/2019 | Actualizada ás 15:00
O programa da Xunta e as entidades sociais para a asistencia a vítimas de trata con fins de explotación sexual atendeu o pasado ano a 690 persoas procedentes de máis de 30 nacionalidades diferentes e que, no seu maior parte, tiñan entre 25 e 54 anos. Así o reflicten os datos recolleitos pola Secretaría Xeral de Igualdade e incluídos no informe anual sobre violencia de xénero, que este xoves presentou no parlamento a secretaria xeral, Susana López Abella, no marco da Comisión 5ª.
En concreto, os programas de asistencia desenvolvidos en colaboración con entidades sociais prestaron asistencia durante o ano pasado a 690 vítimas de trata relacionada coa explotación sexual, das que 351 estaban na Coruña, 116 en Ourense, 115 en Lugo e 108 na provincia de Pontevedra.
Ademais, o informe recolle que o 95% das asistidas eran estranxeiras, mentres que había 27 victimas españolas. As nacionalidades mais frecuentes foron orixinarias de Brasil (225), República Dominicana (125), Colombia (109), Venezuela (40) ou Romanía (36), aínda que se reflicten ata 31 nacionalidades.
Do mesmo xeito, a maior parte eran mulleres (673), mentres que tamén se asistiu a seis homes e a 11 persoas transexuais. A idade máis frecuente das vítimas que participaron nos programas foi de 25 a 54 anos, aínda que 52 eran menores de 25 e 32 tiñan máis de 54 anos.
CENTROS DE ATENCIÓN Á MULLER
No informe tamén se reflicten os datos de asistencia dos Centros de Información á Muller, que, durante o ano pasado recibiron máis de 68.500 consultas a través de 15.722 persoas. Os temas mais habituais foron a atención psicolóxica (26.125 consultas), a asistencia xurídica (17.995), a atención a vítimas de violencia de xénero (10.767) ou a información sobre os recursos dispoñibles (8.257).
Finalmente, o teléfono de atención á muller da Xunta, en 900 400 273, recibiu o pasado ano 3.360 chamadas, o 92% realizadas por mulleres e o 54,35% procedentes da provincia da Coruña. O 57% das consultas tiña que ver coa atención psicolóxica, o 20% cos recursos dispoñibles e o 10% coa asistencia xurídica. O 31% das consultantes, ademais, chamara en máis dunha ocasión. Durante o pasado exercicio adoptáronse en Galicia 2.021 ordenes de protección para vítimas de violencia de xénero, un 4,6% mais que o ano anterior. Pola súa banda, o número de denuncias por este motivo creceu un 1,5%, ata as 6.537.
EDUCACIÓN E SENSIBILIZACIÓN
Durante a súa intervención, Susana López Abella destacou a importancia da educación e a formación na loita contra a violencia de xénero e manifestouse como unha "absoluta defensora" das campañas de sensibilización, co obxectivo de que a sociedade no seu conxunto "perciba a violencia machista como un problema de primeira orde".
Nesta liña, comprometeu o traballo "transversal" da Xunta neste ámbito, que toca aspectos como o deporte, as prazas de abastos, a loita contra o acoso laboral e nas asociacións veciñais ou o lecer nocturno e os festivais.
Do mesmo xeito, e ademais da formación en igualdade dos máis pequenos, a Xunta levou a cabo iniciativas de prevención de violencia de xénero entre o colectivo de mulleres maiores e fomentou as actuacións contra a publicidade sexista, entre outras.
MEDIDAS NO ÁMBITO RURAL
Durante a súa intervención, a deputada socialista María Pierres instou á Xunta a "profundar moitísimo máis" nesta cuestión e a xerar datos estatísticos propios, sobre todo no referente á violencia sexual, á vez que reclamou maior investimento e medidas específicas no ámbito rural.
Pierres, que afeou a Igualdade que as táboas e gráficos do informe inclúan "datos incorrectos", chamou a atención sobre as cifras comparadas das provincias da Coruña e Pontevedra con respecto a Lugo e Ourense, que "constatan" que en ámbito rural segue "tendo un comportamento diferenciado".
Así, por exemplo destacou que, cun incremento en ordes de protección e denuncias, "son sensiblemente menos as mulleres que se acollen á súa dispensa de non declarar" no proceso, que se sitúa no 4% na Coruña pero crece en provincias rurais, ata o 8% en Lugo e "ata o triplo" en Ourense.
Do mesmo xeito, chamou a atención sobre a baixada "dun 12%" en Galicia das chamadas ao 016 e sobre o feito de que ningunha do tres mulleres asasinadas o ano pasado na Comunidade por esta secuela denunciase a situación. "Seguen existindo moitas situacións de violencia que non se denuncian e son moi graves", subliñou.
