"xustiza social, emprego, ecoloxismo e feminismo", a oferta de En Marea para concellos e para Europa
"O próximo día 26 Galicia arrisca moito. Cremos que dereitos como as pensións, a sanidade ou a auga deben estar desmercantilizados. Non podemos permitir que se faga negocio co que é de todas", di Luis Villares.
Por E.P. | SANTIAGO DE COMPOSTELA | 10/05/2019 | Actualizada ás 00:10
En Marea arrincou a campaña electoral cara a dobre cita coas urnas do 26 de maio na que queren levar un "novo" modelo radicado na "xustiza social, o ecoloxismo e o feminismo" ao Parlamento europeo e aos concellos. Na medianoite deste venres, o portavoz do partido instrumental, Luís Villares, arroupou en Lugo á candidata ao Parlamento europeo Lídia Senra e á cabeza de lista de Lugonovo, Xosé Chorén; na tradicional pegada de carteis coa que deron inicio á campaña electoral.
"O próximo día 26 Galicia arrisca moito. Nós cremos que dereitos como as pensións, a sanidade ou a auga deben estar desmercantilizados. Non podemos permitir que se faga negocio co que é de todas", incidiu Villares, que chama a frear "a privatización de servizos, a corrupción, as portas xiratorias e o favorecimiento de empresas amigas". Por iso, apostan por lograr unhas institucións locais e europeas "que garantan un modelo de país sustentable e baseado na transparencia, a rexeneración democrática e a xustiza social".
No acto de Lugo tamén interveu Lídia Senra, número dous da coalición Compromiso por Europa, na que participa En Marea xunto cos valencianos Compromís e outras forzas do ámbito estatal. "A Unión Europea ten recursos suficientes para erradicar a pobreza, para que ningunha persoa viva sen un teito ou sen poder alimentarse correctamente", incidiu a eurodeputada durante a última lexislatura, que remarcou que en Bruxelas se adoptan "en torno ao 80% das decisións" que afectan á vida diaria dos galegos.
Por último, o candidato de Lugonovo á Alcaldía da capital provincial, Xosé Chorén, instou a actuar "con valentía" coa "xustiza social por bandeira" para construír "unha Europa mellor desde o local". "Pensemos localmente, e localmente asentemos as bases dun cambio profunda en Europa", incidiu Chorén.
