O galego escóitase por primeira vez no Festival de Cannes co filme 'O que arde', de Oliver Laxe

A lingua galega escoitouse este martes por primeira vez no Festival de Cannes coa estrea da película de Oliver Laxe 'O que arde', coa que foi seleccionado para competir na sección Un Certain Regard.

Rodada integramente en galego en varias localizacións dos Ancares e doutros puntos de Galicia durante o pasado verán, esta terceira longametraxe de Oliver Laxe contou co apoio da Xunta para a súa produción, encabezada pola empresa compostelá Miramemira.

O director da Agadic, Jacobo Sutil, acompañou o equipo de 'O que arde' no primeiro dos seus catro pases en Cannes, que concluíu cunha prolongada ovación por parte do público. Trátase, ademais, da terceira ocasión na que Oliver Laxe participa neste prestixioso festival, onde xa obtivo o Fipresci da Quincena de Realizadores 2010 con 'Todos vós sodes capitáns' e o gran premio da Semana Crítica en 2016 con 'Mimosas'.

Xunto co realizador galego estiveron tamén nesta estrea Amador Arias e Benedicta Sánchez, os dous actores amateur que protagonizan a película, así como Andrea Vázquez, Xavi Font e Damián Varela, produtores de Miramemira, o guionista Santiago Fillol ou o montador Cristóbal Fernández, entre outros.

'O que arde' conta a historia de Amador, quen regresa a casa da súa nai nunha pequena aldea escondida nas montañas da Galicia rural despois de cumprir condena por provocar un incendio forestal.