En Marea critica a "utilización mediática impresentable" do caso da concelleira de Marea Atlántica investigada
Luis Villares criticou que a nova saia á luz "a catro días das eleccións" e tamén que se faga "uso dunha institución para influír nun goberno que fixo un gran traballo".
Por Europa Press / Redacción | SANTIAGO DE COMPOSTELA | 22/05/2019 | Actualizada ás 17:05
O portavoz de En Marea, Luís Villares, censurou a "utilización mediática imprensentable" do caso da concelleira de Marea Atlántica Claudia Delso que terá que comparecer este venres, en condición de investigada, ante a titular do Xulgado de Instrución número 8 da Coruña en relación á adxudicación de usos do antigo cárcere provincial.
Cuestionado sobre este asunto nunha rolda de prensa celebrada na mañá deste mércores, o maxistrado en excedencia criticou que a noticia saia á luz "a catro días das eleccións" e tamén que se faga "uso dunha institución para influír nun goberno que fixo un gran traballo".
A concelleira de Participación e Innovación Democrática no Concello herculino, Claudia Delso, --que nas eleccións municipais repite na candidatura de Marea Atlántica como número 6--declarará este venres tras ser citada para ese día con anterioridade e despois de desestimar a xuíza o recurso que presentou a concelleira, a través da súa representación legal. Finalmente, segundo informaron fontes próximas ao caso consultadas por Europa Press, deberá comparecer o venres, ás 12:00 horas.
Será tras a denuncia presentada polo PP, avalada polo Ministerio Fiscal, por presunta prevaricación do goberno municipal coruñés na adxudicación de usos do antigo cárcere ao colectivo Proxecto Cárcere.
