Histórico: o Festival de Cannes premia por primeira vez un filme en galego, 'O que arde', de Oliver Laxe

A película 'O que arde' do director Oliver Laxe (París, 1982) recibiu o premio do xurado no Festival de Cannes, no que concursaba na sección 'Un certain regard'. Foi a primeira vez que se proxectaba un filme en galego no certame francés e, polo tanto, a primeira vez que unha produción en lingua galega é premiada neste festival.

Segundo o palmarés que se deu a coñecer este venres, Laxe recibiu este galardón, mentres que o premio especial do xurado recaeu sobre o catalán Albert Serra coa súa obra 'Liberté'.

'O que arde', coa que o galego se escoitou por primeira vez en Cannes, estreouse o pasado martes no festival e é a terceira longametraxe do director galego.

A de Oliver Laxe é unha traxectoria de éxito nesta cita, xa que as súas dúas anteriores películas xa foron galardoadas no festival francés.

Este seu terceiro filme está rodado nos montes dos Ancares e nel Laxe reflexiona sobre a problemática dos incendios forestais que vive Galicia, a piromanía e as relacións veciñais.

A película conta como Amador Coro sae de prisión tras ser condenado por provocar un incendio. Regresa á súa vila, illado nas montañas, no máis profundo da Galicia rural, onde vive coa súa anciá nai, Benedicta, e tres vacas. As súas vidas transcorren lentamente, ao ritmo apracible da natureza ata o día en que o lume aparece para devastar a zona.

Laxe competía na sección 'Un certain regard', que conta con 18 películas, xunto a directores como Albert Serra (que presentaba 'Liberté'), Bruno Dumont ('Jeanne') ou Christophe Honoré ('Chambre 212').

Con guión do propio Laxe con Santiago Fillol, a fotografía corre a cargo de Mauro Herce. A película está protagonizada por actores amateur como Amador Arias e Benedicta Sánchez.

É unha coprodución de Galicia, Francia e Luxemburgo, na que participa a galega Miramemira. Conta co apoio de Agadic, TVG e Deputación de Lugo, entre outras.