Feijóo non asume como fracaso ter enviado a cinco conselleiros como candidatos ás cidades
"O problema é que teñen o estigma de ser do Partido Popular. Se fosen do Partido Socialista serían todos alcaldes", apuntou.
Por Galicia Confidencial | Compostela | 13/06/2019 | Actualizada ás 20:35
Cinco conselleiros "queimados" en catro anos e sen que ningún deles goberne en ningunha das grandes cidades galegas. A aposta do Partido Popular, e do propio Feijóo, para recuperar catro concellos e manterse no quinto --Ourense--, non funcionou. Con todo, Alberto Núñez Feijóo non asume que teña sido unha decisión súa. "Foi de todo o partido", suliñou.
Preguntado por GC na rolda de prensa posterior ao Consello da Xunta Feijóo recalcou que as direccións locais dos partidos "elixen con autonomía" aos seus candidatos nas eleccións municipais. Por iso, considerou que non foi "erro" persoal que que cinco exconselleiros liderasen listas nas cidades e ningún teña posibilidades de gobernar --Jesús Vázquez en Ourense, Beatriz Mato na Coruña, Elena Muñoz en Vigo, José Manuel Rey Varela en Ferrol e Agustín Hernández en Santiago--.
"Se estes conselleiros fosen do Partido Socialista serían todos alcaldes, excepto en Vigo", asegurou, despois de lembrar que na Coruña, Ferrol e Lugo os populares venceron os comicios. "O problema non é a aposta, o problema é que teñen o estigma de ser do Partido Popular. Se fosen do Partido Socialista serían todos alcaldes e sería felicitados por perder as eleccións", sentenciou.
