As “Maldivas tóxicas” ou o “Chernobyl” de España, a imaxe de Galicia nos xornais sensacionalistas anglosaxóns

“Primeiro foron as Seychelles de Siberia - ¡agora España ten as Maldivas Tóxicas! Os amantes de Instagram inundan un lago turquesa debido á súa perigosa contaminación, como o popular lugar ruso”. “Os turistas acoden a 'Chernobyl Galego' para posar en augas contaminadas” ou “os amantes de Instagram falan sobre o lago velenoso turquesa de Monte Neme en España”. Estes son algúns dos titulares de medios sensacionalistas anglosaxóns. Titulares que recollen, a súa vez, a polémica suscitada por medios españois logo de que “instagrammers” sacaran fotos bañandose nas augas deste lago dunha mina abandonadas.

Así o sensacionalista británico Daily Mail destaca que o Monte Neme amosase coma un “lugar idílico” por instagrammers e apunta que o lago é froito da actividade dunha antiga mina da Segunda Guerra Mundial “contaminada” por produtos químicos. “Aqueles que se bañaron neles queixáronse de irritación ocular e problemas na pel”, indica ao tempo que vai máis alá no seu sensacionaismo e suliña que estas contaminacións xa se comparan cos “instagrammers contaminados siberianos de Rusia”.

Pola súa banda, o tamén británico Daily Start destaca que o Monte Neme coñécese como o “Chernobyl galego polo seu lago contaminado”. “A pesar das advertencias, os visitantes posan diante da auga para Instagram”, suliña ao facerse eco das informacións publicadas por outros medios españois.

“Un lago turquesa en España, popular entre os instagrammers, é comparado coas Seychelles de Siberia, xa que a súa auga provén dunha antiga mina contaminada químicamente da época da Segunda Guerra Mundial”, escribe, pola súa banda, o estadonidense Whashington New Day.

TRATAMENTO SENSACIONALISTA

Esta é a imaxe que trasladan de Galicia uns medios estranxeiros que o que fan é copiar o tratamento sensacionalista doutros moitos medios galegos e estatais utilizando coma fonte “varios” usuarios de Instagram (ninguén especifica o número ou unha cifra aproximada) que denunciaron estar padecendo doenzas e sendo “hospitalizados” por, din, bañarse nestas augas tóxicas. El Español foi o primeiro que levantou a veda, o 3 de xullo pasado; seguíronlle Público, El Confidencial, 20Minutos, La Vanguardia, Cope, El Mundo, ABC, Libertad Digital, La Voz de Galicia, El Progreso de Lugo, Diario de Pontevedra, GCiencia, Elnacional.cat, Vozpópuli, Telecinco, Antena 3, LaSexta, Cadena Ser…

Con todo, nin a Consellería de Sanidade, nin ningún hospital galego ten constancia de ningún ingresado ou persoa atendida por terse bañado nas augas do lago do Monte Neme. Entidades ecoloxistas como Petón do Lobo ou a Plataforma pola Defensa do Monte Neme teñen denunciado o tratamento “sensacionalista” destas informacións.

Ana Varela, secretaria de Petón do Lobo queixábase no Galicia Confidencial de que o Monte Neme só se coñeza polo seu lago contaminado e non pola riqueza patrimonial e histórica que atesoura. Ademais, lembraba a necesidade de rexenerar esta mina abandonada e criticaba a Xunta e concellos por non asumir as súas responsabilidades neste asunto.

Tamén Adrián Eirís, coordinador da Plataforma pola Defensa do Monte Neme, abordaba nun artigo publicado no GC a turistización indiscriminada e sen control dun monte que debería ser patrimonio cultural e natural da Costa da Morte. "Queremos un “posTurismo” ou “turismo negro” (“dark tourism”) de paisaxes degradadas alieníxenas devidas en escenarios do glamour?, ou pola contra, queremos ter unha oferta verde e cultural que encaixe coa historia do noso monte e da nosa terra?", apuntaba.