Veciños de Teo acusan á Xunta de permitir traballos nunha canteira para un vertedoiro encuberto
O Executivo galego informou á plataforma Casalonga Limpa de Residuos nunha reunión que Toysal, empresa agora propietaria dos terreos, ten aprobado o baleirado da lagoa na vella canteira e poderá comezar coa actividade mineira en calquera momento.
Por Galicia Confidencial | Teo | 19/08/2019 | Actualizada ás 11:34
A plataforma Casalonga Limpa de Residuos comunicou este luns a postura da Xunta de non considerala “parte interesada no conflito contra a actividade de Toysal na canteira de Casalonga, denegándolle a lexitimidade para ter acceso aos documentos”. Ao mesmo tempo, segundo se indica nun comunincado da plataforma, a Xunta informou a este colectivo “nunha reunión que Toysal ten aprobado o plan de labores e o baleirado da lagoa polo que pode comezar coa actividade mineira en calquera momento”.
Isto foi comunicado aos representantes da plataforma durante unha reunión celebrada hai dez días co xefe de servizo provincial de Minas, o xefe territorial da Consellería de Industria e o delegado da Xunta na Coruña. “Confirmáronlles o peor dos seus pronósticos, que Toysal dispón xa de todos os permisos para comenzar a actividade mineira na canteira, co plan de Labores aprobado e o permiso para baleirar a lagoa incluído”.
Ademais disto, a Xunta respondeu de forma negativa á solicitude da plataforma veciñal para personarse como parte interesada na actividade de Toysal na canteira da Casalonga. “A mediados de agosto a Xunta responde que a plataforma Casalonga Limpa de Resíduos non ten lexitimidade para personarse no expediente administrativo”.
O vindeiro martes a plataforma reunirase de urxencia con todas as mesas de traballo para valorar os novos pasos a dar. “As malas noticias recibidas estes días preocúpanos pero non nos paralizan. Non imos deixar que instalen un vertedoiro encuberto no medio de núcleos densamente poboados”. Segundo Casalonga Limpa de Residuos, a actividade mineira de Toysal “é un engado para verter 10 millóns de metros cúbicos de residuos e vaino facer a través do plan de restauración. Se a Xunta non o ve ímosllo facer ver”.
A única posibilidade que ven nestes momentos desde a plataforma é un cambio lexislativo que “evitaría os problemas derivados da execución de plans de restauración”. Durante a reunión na Xunta o 8 de agosto solicitaron un encontro co grupo parlamentario do Partido do goberno para poder abordar este tema. “Están a espera dunha resposta” din desde Casalonga Limpa de Resiudos.
