O aeroporto de Santiago, o máis barato para aparcar
Estímase que, durante esta operación retorno, pasen ao redor duns 30 millóns de pasaxeiros por todos os aeroportos do Estado.
- Grandes diferencias nos aeroportos galegos: Alvedro e Lavacolla soben e Peinador, baixa
- O aeroporto da Coruña crece un 10,7% na primeira metade do ano, fronte á baixada do 1,8% de Vigo
Por Galicia Confidencial | Santiago de Compostela | 01/09/2019 | Actualizada ás 14:25
O aeroporto de Santiago de Compostela ten os prezos máis económicos para aparcar durante a operación retorno, con tarifas que van desde os 4 aos 10 euros, segundo un estudo de ElParking.
Valencia, Alicante e Murcia seguen á capital galega, con tarifas mínimas de 6 euros por unha reserva previa de 8 horas nalgúns dos seus estacionamentos. A continuación, atópanse Palma de Mallorca e Málaga (7€); Forteventura, Zaragoza e Melilla (8€); Jerez, Santander, Pamplona e Valladolid (9€); A Coruña, Reus, Vigo, Xirona, Eivissa e Gran Canaria (10€); Asturias, Almería e Lanzarote (11€); Granada, Tenerife, San Sebastián, Sevilla e Menorca (12€).
Pola contra, os tres aeroportos máis caros para aparcar son o de Bilbao, cunha tarifa de 16 euros coa reserva previa, Barcelona-El Prat e Madrid-Barajas, que teñen tarifas máximas de ata 25 euros cunha reserva mínima de 8 horas.
TRÁFICO MASIVO DE PASAXEIROS
Estímase que, durante a operación retorno, pasen ao redor duns 30 millóns de pasaxeiros por todos os aeroportos do Estado, cifra que representará un incremento dun 7,5% respecto ao mesmo mes de 2018.
