Mobilización contra a imputación de políticos e traballadores que se manifestaron en defensa de Alcoa no Congreso
O 24 de setembro convócase unha concentración na Coruña e o 8 de outubro en Ferrol.
Por Europa Press / Redacción | SANTIAGO DE COMPOSTELA | 19/09/2019 | Actualizada ás 18:17
Comisións Obreiras convocou concentracións a nivel galego para manifestarse en contra da imputación de tres deputados de Unidas Podemos —dous deles por Galicia en Común—, así como a de varios traballadores da organización e de Alcoa que se manifestaron o pasado marzo diante do Congreso dos Deputados polo peche de varias plantas da compañía en Galicia e Asturias.
En concreto, o xulgado de instrución número 25 de Madrid abriu unha investigación contra os deputados Rafa Mayoral, Yolanda Díaz e Antón Gómez-Reino, así como á exdeputada de En Marea Ángela Rodríguez por un presunto delito de atentado contra a autoridade.
Todos se manifestaron o pasado 28 de marzo fronte ao Congreso para apoiar a protesta do persoal de Alcoa, na que houbo cargas policiais. Os catro formaron parte da manifestación e o pasado martes recibiron unha citación para declarar ante o xulgado polos delitos dos que se lles acusa.
Ademais, segundo Comisións Obreiras tamén están denunciados o secretario xeral de CC.OO-Industria, Víctor Ledo, o presidente do comité de empresa de Alcoa da Coruña, Juan Carlos López Corbacho, e outros dous traballadores afiliados ao sindicato.
CONVOCATORIAS
Ante a situación, o sindicato anunciou dúas concentracións na Coruña e Ferrol. A primeira será o 24 de setembro ás 11,00 horas diante dos Xulgados da Coruña. A segunda celebrarase á mesma hora o 8 de outubro fronte aos Xulgados de Ferrol.
Desta maneira, ambas as citas cadrarán coas comparecencias xudiciais dos acusados. Igualmente, a organización lamenta a "persecución" aos imputados e nega "o delito que se lles atribúe" porque "numerosas imaxes demostran que non opuxeron ningunha resistencia", nin a identificarse nin cando empezaron as "desproporcionadas cargas policiais".
Por todo iso, lembra que "defender a clase traballadora non é delito" e esixe ao Goberno que o próximo 10 de novembro "saia das urnas" coa promesa de "derrogar a Lei Mordaza" que, desde a súa creación, só "serve para castigar e criminalizar toda forma de protesta social".
