Francisco Conde: "Para durmir tranquilos en Alcoa San Cibrao necesitamos un prezo eléctrico competitivo"

O conselleiro de Economía e Emprego, Francisco Conde, volveu a reclamar este mércores ao Executivo estatal que poña en marcha as medidas necesarias para dotar ás empresas electrointensivas dun prezo eléctrico competitivo que garanta a súa viabilidade.

"Señores socialistas, para durmir tranquilos en Alcoa San Cibrao necesitamos un prezo eléctrico competitivo", subliñou en resposta a unha pregunta formulada polo deputado do PP Daniel Veiga.

Na súa intervención, o titular de Economía asegurou que, no conflito de Alcoa, a Xunta "actuou para ser parte da solución e a disposición do Goberno central", cuestión que, na súa opinión, non se está producindo por parte do Executivo estatal.

"Levamos un ano esperando a que o Goberno concrete o contido do estatuto para os consumidores electrointensivos. Por iso presentamos unha proposta concreta que permita que as electrointensivas teñan un prezo na pinza dos 35 e 45 euros por megawatt", manifestou en referencia á proposta de borrador presentada pola Xunta.

FERROATLÁNTICA

Na sesión plenaria, ademais, o conselleiro respondeu a outra pregunta formulada pola deputada socialista Begoña Rodríguez Rumbo, neste caso sobre a posible venda de Ferroatlántica.

Respecto diso, o conselleiro explicou que a operación de venda "non necesita autorización" porque "non afecta á titularidade das concesións" que, conforme sinalou, "séguea ostentando Ferroatlántica".

A partir de aí, subliñou que a Xunta esixirá a Ferroatlántica que "cumpra estritamente o que marca a lei". "E por iso non se permitirá en ningún momento a segregación das actividades hidroeléctricas e industriais", indicou.

FEGAMP

O conselleiro de Facenda, Valeriano Martínez, fixo un chamamento á Federación Galega de Municipios e Provincias (Fegamp) para "ir da man" para esixir ao Goberno central os recursos que debe "a todos os galegos".

En resposta a unha pregunta formulada polo portavoz parlamentario do PPdeG, Pedro Puy, durante o pleno da Cámara, o titular de Facenda volveu a acusar o Executivo de Sánchez de facer "bullying financeiro" ás comunidades autónomas pero "tamén ás entidades locais".

Na súa intervención e despois de que o martes o Congreso aprobase o pago das entregas a conta ás comunidades --a Galicia correspóndenlle 400 millóns--, Valeriano Martínez deixou claro que a Xunta "en ningún caso" aceptará que non se pague tamén os 370 millóns que se lle debe á Comunidade en relación á incidencia do IVE --200 millóns-- e polo cumprimento da débeda --170 millóns--.

"Non aceptaremos outro escenario e, agora que empeza a campaña, esperemos que os líderes que veñan por aquí confirmen se van devolver e entregar o que é noso ou se van pasar de esguello", manifestou.

Pola súa banda, o portavoz parlamentario do PPdeG acusou ao Goberno de Sánchez de utilizar este asunto para desviar a atención dos incumprimentos dos obxectivos de déficit marcados pola Unión Europea.

GASTO SOCIAL

Minutos antes, o conselleiro de Facenda defendeu o gasto social da Xunta fronte á deputada do grupo mixto Paula Vázquez Verao, que interpelara a Valeriano Martínez sobre "a redución do gasto social" nos orzamentos autonómicos durante a última década.

Na súa resposta, o titular de Facenda asegurou que os argumentos da parlamentaria estaban sustentados en datos "incorrectos" pois, con base en informes, realizaba comparacións de orzamentos liquidados cos iniciais.

"Informes sobre cuestións orzamentarias hai moitos e moi variados", incidiu Martínez. "Os orzamentos son o mellor informe que se pode consultar sobre os recursos que se pon a disposición da cidadanía", apostilou o conselleiro, que puxo o foco en que o Goberno galego "leva seis anos aumentando os recursos do gasto social" e que as contas do próximo ano son "as mellores da historia" en "sanidade, educación e políticas sociais".