O loro de Feijóo

En moitos países de Hispanoamérica, as familias de ben adoitaban posuír un loro como animal de distracción. Xa for polo gusto do loro ou polo do propietario, era común deixar nas gaiolas os refugallos do chocolate que degustaban na casa. Como é sabido, unha vez que moitas desas familias entraron en deleiba financeira, decidiron eliminar a ración de chocolate do loro.

Por Marcelino Fdez. Mallo | A Coruña | 25/07/2012

Descoñécese se tal determinación foi causa de liortas no seo do fogar inda que eu aposto pola existencia de intensas rifas e discusións. Poderían esquecer deste xeito as penurias económicas e demorar as decisións de maior envergadura. Para min que Feijóo imaxina o Parlamento coma unha gaiola xigante e identifica, teno doado, algúns deputados con aquelas aves psitaciformes.

El sabe (todos sabemos) que pasar de 75 a 60 representantes na Cámara tería sobre as contas públicas galegas un efecto minúsculo. Pero tamén sabe que gañou unhas eleccións cun par de fotografías e unhas maledicencias sobre coches oficiais e cadeiras invisibles. Pouco máis lle fixo falta. Se con isto da redución de parlamentarios consegue facer ruído dabondo, quizais lle abonde para confrontar o seu propósito de austeridade coa ansia de dilapidación da oposición.

A oposición (a de dentro e a de fóra do Parlamento) non debería caer no tirapuxa que pretende o PP galego. De feito, habería presentar a súa contraproposta. Aceptar a redución de deputados sempre e cando se inclúa nun Plan de racionalización completo que contemple a eliminación das deputacións provinciais e a contracción dos concellos ata un número razoable de 40-50. Tería tanto sentido a decisión que ata o loro ficaría de acordo. Feijóo?