Juan Carlos Quer: "Sigo confiando na xustiza"
Primeiras reaccións do pai de Diana Quer tras coñecer que o xuíz devolveu o veredicto ao xurado. O avogado da acusación particular di que "simplemente" se pediu ao xurado "que motiven máis" as súas deliberacións.
Por Europa Press / Redacción | SANTIAGO DE COMPOSTELA | 29/11/2019 | Actualizada ás 14:09
Juan Carlos Quer, o pai de Diana, trasladou o seu "respecto" tras a decisión do maxistrado Ángel Pantín de devolver o veredicto ao xurado, tras constatar posibles contradicións e erros formais que requiren unha maior fundamentación.
En declaracións aos medios ás portas dos xulgados de Santiago, Juan Carlos Quer pediu que se deixe aos membros do xurado efectuar "do modo máis tranquilo posible" as súas deliberacións ante as cuestións indicadas polo maxistrado sobre o veredicto.
"Simplemente, que sigo confiando na Xustiza. Nada máis", concluíu o pai de Diana, firme defensor de que Enrique Abuín Gey, 'O Chicle', sexa condenado polo crime de filla e se lle impoña a prisión permanente revisable.
ACUSACIÓN PARTICULAR
Pola súa banda, avogado Ricardo Pérez Lama, que exerce a acusación particular no xuízo polo asasinato de Diana Quer, quixo quitar ferro á decisión do maxistrado Ángel Pantín.En declaracións aos medios á súa saída dos xulgados composteláns, o letrado que representa á familia Quer aclarou que "simplemente" se pediu ao xurado "que motiven máis" as súas deliberacións e que este sábado, "probablemente", acudirán de novo "a ver se conformaron debidamente" as súas decisións sobre o caso.
A pesar diso, aclarou, todo "está en mans" do maxistrado Anxo Pantín posto que aínda terá que analizar o novo veredicto e ver se está "debidamente motivado" ou se será necesario que os membros que conforman o xurado popular argumenten e precisen máis as súas consideracións.
