O Parlamento homenaxea a Celso Emilio Ferreiro, "figura determinante" polo seu compromiso con lingua e cultura galegas
Conmemora o 40 aniversario do falecemento do autor.
Por Europa Press / Redacción | SANTIAGO DE COMPOSTELA | 02/12/2019 | Actualizada ás 20:19
O Parlamento de Galicia acolleu na tarde deste luns un acto de homenaxe a Celso Emilio Ferreiro para conmemorar o 40 aniversario do seu falecemento.
O presidente da Cámara, Miguel Ángel Santalices, subliñou que "nada do que acontece en Galicia, ningunha corrente de pensamento, ningún feito histórico, literario, social ou cultural debe resultar alleo ao Parlamento de Galicia, a casa de todos os galegos".
Por esta razón, dixo que "xornadas como esta, que conmemora o 40 aniversario do falecemento de Celso Emilio Ferreiro, son e serán sempre benvidas nesta institución".
"Máxime tendo en conta que somos en gran parte debedores do traballo, do sufrimento, da incomprensión e do infinito talento de figuras como a que hoxe homenaxeamos", subliñou.
Ademais, o titular do Lexislativo anunciou que a homenaxe deste luns terá continuidade coa publicación dunha obra sobre Celso Emilio Ferreiro con textos de Ramón Nicolás e patrocinio da Secretaría Xeral de Política Lingüística da Xunta e do Parlamento.
