Directores do Novo Cinema Galego ofrecen películas gratis en liña
Obras de cineastas como Oliver Laxe, Xurxo Chirro, Jaione Camborda e Lois Patiño están nun catálogo en crecemento
Por Europa Press / Redacción | SANTIAGO DE COMPOSTELA | 17/03/2020 | Actualizada ás 19:52
Directores do Novo Cinema Galego ofrecen algunhas das súas obras en liña de forma gratuíta con motivo do estado de alarma polo coronavirus, que entre outras cuestións obrigou a pechar todos os cinemas do país.
En conversación con Europa Press, o impulsor desta iniciativa, o director Xurxo Chirro --xunto aos produtores Beli Martínez e Felipe Lage-- explica que se ofrecen estas obras para que a xente poida "divertirse, entreterse ou estudalas" nun momento no que non se pode saír de casa.
Precisamente, este 2020 o Novo Cinema Galego, termo acuñado polo crítico Martin Pawley en 2010, cumpre unha década. Aquel ano produciuse a estrea de 'Todos vós sodes capitáns', de Oliver Laxe, obra que se pode ver en liña grazas a esta iniciativa.
Así, na web (http://novocinemagalego.info/10anosncg/) están cintas como 'Vikingland', do propio Xurxo Chirro; 'Arraianos', de Eloy Enciso; e 'O Quinto Evanxeo de Gaspar Hauser', de Alberto Graza.
O cineasta Xurxo Chirro sinala que tiña pensando ofrecer de forma aberta 'Vikingland' con motivo do seu décimo aniversario --a cinta é de 2011--, pero cre que "é unha boa ocasión" para facelo "e agora xa é patrimonio de todos os galegos". É unha obra "medio de culto" con varios galardóns --como o cultivado no Play-Doc en 2012--, realizada a través de 'found footage' sobre a tripulación dun mercante galego.
Chirro valora que os creadores "se van animando" e avanza que o mércores "haberá máis sorpresas". A idea é que só haxa unha peza de cada director para ofrecer un catálogo "máis representativo" do Novo Cinema Galego e "moito máis diverso".
Sobre a oportunidade para o público de poder acceder estas obras, moitas das cales non son fáciles de conseguir, o autor de 'Vikingland' reflexiona sobre que "debería haber iniciativas públicas" por parte da Xunta e Agadic "para que se visen". Opina tamén que a TVG2 podería apostar "por un bo material como este para proxectar".
LISTA DE OBRAS EN CRECEMENTO
Tamén están dispoñibles, entre outros, para poder ver desde casa curtametraxes e mediometrajes de autores como Xisela Franco e Ánxela Caramés ('Hyohakusha'); Xacio Baño ('Ser e Voltar'), Sonia Méndez con 'Leo e Mario (déixanse)'; e Jaione Camborda ('Rapa das Bestas').
