Axentes ambientais e bombeiros forestais suman case 2.300 desinfeccións en ambulatorios e residencias do rural

Axentes ambientais e bombeiros do servizo de prevención e defensa contra os incendios forestais de Galicia realizaron case 2.300 desinfeccións en centros de saúde e residencias de maiores e discapacitados cando se cumpren catro semanas da súa colaboración para previr contaxios do coronavirus.

En concreto, ata o pasado domingo efectuaron un total de 2.291 desinfeccións, das cales 418 rexistráronse en centros asistenciais da provincia da Coruña, 503 en instalacións de Lugo, 1.114 na provincia de Ourense e 256 na de Pontevedra.

En paralelo, o persoal do servizo de prevención de incendios entregou máis de 170 alfombras e 300 sprays desinfectantes para reforzar a protección de centros de saúde e residencias, pero tamén de oficinas comarcais, puntos de encontro e os propios distritos forestais.

As desinfeccións, que estes traballadores realizan de maneira totalmente voluntaria, están a levarse a cabo de forma recorrente en ata 200 municipios galegos con menos de 5.000 habitantes. Ademais de nos exteriores dos centros asistenciais, está a actuarse noutras áreas do rural especialmente sensibles, como as beirarrúas ou as zonas establecidas para a recollida do lixo.

A Xunta subliña que as funcións adicionais que realizan estes profesionais non impiden que desenvolvan o seu labor principal, que é a de prevención e extinción dos incendios forestais que se poidan rexistrar en todo o territorio galego.