O PSdeG reitera que traballa por unha investigación sobre o acontecido nas residencias de maiores na Cámara galega

O PSdeG trasladou este mércores o seu apoio ás familias de usuarios de residencias nas súas demandas e reafirmou que traballa para impulsar unha comisión de investigación no Parlamento galego sobre o ocorrido nestes centros por mor da pandemia de covid.

Varios deputados socialistas, encabezados polo líder do PSdeG, Gonzalo Caballero, reuníronse con representantes da federación de familiares de usuarios de residencias REDE, que tiveron encontros ao longo da mañá cos tres grupos parlamentarios.

Caballero mostrou "todo o apoio" ás peticións destas familias, que reclaman mellores cocientes de persoal nas residencias para "humanizar" os coidados aos maiores e que estes reciban unha atención adecuada. Tamén piden que a Xunta desenvolva uns protocolos que permitan visitas "en condicións de seguridade" aos centros residenciais.

O secretario xeral do PSdeG e portavoz parlamentario dos socialistas informou o martes da presentación dunha iniciativa --unha proposición non de lei-- na Cámara galega para a creación dunha comisión de investigación sobre as residencias e hoxe reiterou que manterá esa "liña de traballo", tal e como comprometeu na campaña electoral.

O presidente de REDE, Paulino Campos, manifestou ante os deputados socialistas a súa "preocupación" pola "desidia" da Xunta, posto que considera que hai "unha falta de avance" nestes meses, indicou o PSdeG nunha nota de prensa.

Reunión de deputados do PSdeG, co seu líder, Gonzalo Caballero, á cabeza, con membros de asociacións de familiares de usuarios de residencias de maiores. PSDEG | Fonte: Europa Press