A deputada do PSdeG Noa Díaz despídese da corporación santiaguesa, á que regresan dous ex edís de CA
María Rozas e Xan Duro, que ocuparon responsabilidades de goberno no pasado mandato, volven ao concello tras a saída de Noriega e Pena.
Por Europa Press / Redacción | SANTIAGO DE COMPOSTELA | 04/09/2020 | Actualizada ás 11:13
A ata agora concelleira de Educación no goberno local de Santiago, Noa Díaz, formalizou este venres a súa saída da corporación do Concello de Santiago, que deixa para centrarse nas súas novas tarefas como deputada do Grupo Socialista no Parlamento de Galicia.
A saída de Díaz das súas responsabilidades locais era pública desde a súa designación en 'postos de saída' na lista do PSdeG para as eleccións autonómicas que primeiro se aprazaron pola pandemia en abril para despois retomarse o pasado mes de xullo.
Este venres, a nova parlamentaria despediuse do pleno do concello da capital galega nunha sesión na que tomaron posesión María Rozas e Xan Duro como novos edís do grupo de Compostela Aberta.
Tanto Rozas como Duro ocuparon cargos dentro do equipo que gobernou a cidade compostelá entre 2015 e 2019. Regresan ao Pazo de Raxoi en substitución do exalcalde Martiño Noriega e Rafael Pena, que anunciaron a súa marcha do concello a mediados do mes de xullo.
Tras a toma de posesión destes como novos edís, os portavoces dos catro grupos con representación no pleno local --Goretti Sanmartín (BNG), Marta Lois (Compostela Aberta), Alejandro Sánchez-Brunete (PP) e Gumersindo Guinarte (PSOE)-- tomaron a palabra para despedir a Díaz. Só o popular criticou a marcha da exedil de Educación por producirse ás portas do inicio do curso escolar.
