BNG apoia a Torra: "Isto retrata á Xustiza española, que actúa por criterios políticos moi pouco democráticos"
"Cando os cataláns votan o que non lle gusta á caverna, encárganse de resolvelo por esta vía", di Néstor Rego.
Por Europa Press / Redacción | MADRID | 29/09/2020 | Actualizada ás 13:57
O deputado do BNG no Congreso, Néstor Rego, expresou o seu respaldo ao xa expresidente catalán Quim Torra tras a súa condena de inhabilitación e acusou á Xustiza de actuar "por criterios políticos moi pouco democráticos".
En declaracións no Congreso, Rego sinalou que "non parece concebible" que un tribunal quite a Presidencia elixida democraticamente, dada polas urnas, "e por unha cuestión como non retirar a pancarta". Ademais, non lle parece "sensato" que todo o procedemento empezase coa Xunta Electoral Central actuando como un tribunal.
A súa conclusión é que esta decisión "retrata á Xustiza española, que actúa por criterios políticos moi pouco democráticos". "Van xa tres presidentes da Generalitat que pasan polos tribunais e isto debería facer reflexionar sobre a calidade da democracia --sostén--. Dá a impresión de que, cando os cataláns votan o que non lle gusta á caverna, encárganse de resolvelo por esta vía".
O BNG é un dos partidos que apoiaron a investidura de Pedro Sánchez e que, en cambio, non quixo asinar o escrito reprochando ao PP o bloqueo da renovación do Consello de Poder Xudicial. Segundo Rego, buscan "un modelo diferente" de "democratización do poder xudicial" e de transferencia da xustiza, para que os tribunais superiores das comunidades sexan a última instancia no canto do Supremo.
