Por que o río do Parque Natural das Fragas do Eume baixa contaminado?

O vicesecretario xeral do PSdeG, Pablo Arangüena, criticou este domingo “o desleixo e o abandono total” dos espazos naturais por parte da Xunta logo do episodio dos verquidos ao río Eume.

Ao respecto, o dirixente socialista recordou que o Concello de Pontedeume tivo que prohibir o consumo da auga procedente do río que baixa do parque natural das Fragas do Eume a causa do mal aspecto que presentaba o caudal.

Ante un caso de turbidez das augas e de posible afectación aos bancos marisqueiros, Pablo Arangüena denunciou que este parque natural “leva 23 anos sen que se aprobe o seu correspondente plan de xestión”.

“A Xunta está consentindo todo tipo de agresións ás Fragas do Eume”, subliñou o vicesecretario xeral do PSdeG, quen reprochou tamén ao goberno galego que “nin se puxo en contacto cos concellos afectados” ao longo destes días.

Filmación de Expedición Galicia, programa do TVG, nas fragas do Eume; nunha imaxe das redes sociais do espazo