Presentan unha querela criminal contra Alcoa, Parter e Grupo Riesgo por "fraude" na venda da planta da Coruña

A Confederación de Cadros e Profesionais (CCP), a través da súa Asociación Profesional de Cadros de Alcoa (CCP-APC), presentou unha querela criminal ante a Audiencia Nacional contra Alcoa Inespal SL., Parter Capital Group e Grupo Industrial Riesgo pola súa suposta implicación na venda "irregular" das plantas da Coruña e Avilés, ambos as dúas propiedade de Alcoa ata xullo de 2019, e agora en mans do Grupo Industrial Riesgo.

A querela insta á fiscalía a que investigue o "plan maquinado" polos querelados que supostamente consistía en trasladar a titularidade destas dúas fábricas a un fondo inexistente denominado, Grupo Industrial Riesgo, a través de System Capital Management, "sen histórico financeiro e sen a solvencia necesaria para desenvolver a actividade industrial, pondo en risco investimentos superiores a 40 millóns de euros, comprometidos por Alcoa".

Debido a esta operación e á súa xestión, o sindicato sostén que está en risco a continuidade de máis de 600 traballadores e unha importante afección nas comarcas onde se atopan situadas.

"As irregularidades que se foron producindo no último ano alcanzan presuntos delitos de estafa, alzamento de bens, actuar contra a seguridade dos traballadores, así como por apropiación indebida e insolvencia", afirman as mesmas fontes sindicais.

Na querela presentada por CCP-APC tamén se insta a investigación dos responsables do fondo de investimento suízo Parter Capital Group e Grupo Industrial Riesgo a través das sociedades instrumentais Blue Motion Technologies Holding AG, e a actual propietaria das fábricas System Capital Management.

Na querela criminal CCP-APC pon de manifesto como os querelados "urden un plan para facerse co control das dúas fábricas de Avilés e A Coruña mentres se estaba negociando unha solución para evitar un Expediente de Regulación de Emprego comunicado pola dirección de Alcoa, en outubro de 2018, e que afectaba a 688 traballadores das dúas plantas, e que, de xeito evidente resultou ser unha presunta fraude".

En xullo de 2019, Alcoa anunciou a venda das dúas plantas a Parter Capital Group que se comprometeu a manter os postos de traballo de todos os empregados, polo menos, durante dous anos, "con todo este fondo de investimento suízo iniciou unha negociación para a súa venda aos poucos meses, incumprindo o acordado con Alcoa", explica CPC-APC.

Con carácter previo á compra, "Parter Capital Group e o seu fondo Blue Motion Technologies Holding AG constituíran dúas sociedades unipersoais de carteira e tenencia de activos ALU HOLDING AC SPAIN SL. e ALU HOLDING AVL 2019 SPAIN SL. cun capital social de 3.000 euros cada unha delas, como sociedades pantalla que protexesen ao comprador de eventuais responsabilidades patrimoniais, converténdose en titular de ALU IBÉRICA AC SL. (a antiga fábrica de Alcoa na Coruña) e a ALU IBÉRICA AVL SL, (a fábrica de Alcoa en Avilés), cun capital social de 3 millóns de euros cada unha delas".

Na querela criminal, presentada por CCP-APC, asegúrase que "nunca tiveron intención de aplicar un plan industrial comprometido cos traballadores, sen que se realizase ata a data ningún dos investimentos previstos no plan estratéxico do acordo de venda, condenando ás empresas á súa desaparición, abocando aos traballadores a acudir ao Fogasa para poder cobrar o subsidio de desemprego".