O 'popular' Manuel Baltar defende "a vixencia do pensamento político da Xeración Nós"

O presidente da Deputación de Ourense, Manuel Baltar, defendeu "a vixencia do pensamento político de Nós" e reivindicou a propia cidade de Ourense como "a base do movemento político, social e cultural" desta xeración de intelectuais.

Así o trasladou durante a súa participación no debate organizado pola entidade provincial e que contou con voces como o presidente do Partido Nacionalista Vasco, Andoni Ortuzar, o presidente do Museo do Pobo Palego, Xusto Beramendi, o secretario xeral de Compromiso por Galicia, Juan Carlos Piñeiro, a filóloga Pilar García Negro ou o avogado Lluis Recoder.

Baltar defendeu o protagonismo de Ourense nas orixes da xeración. "Temos sentimento de pertenza a unha terra, a ourensania que xurdiu da corrente política e cultural a través da Irmandade Nacionalista Galega e do Partido Nacionalista Republicano de Ourense".

Pola súa banda, os participantes estableceron paralelismos entre o escenario político e socioeconómico no que xurdiu o movemento galeguista, sinais fundamentais da Xeración Nós, e os nacionalismos vascos e cataláns e a súa vixencia.

Neste sentido, o presidente do Museo do Pobo Galego falou da orixe do nacionalismo galego "como resposta a un estado cun férreo centralismo nunha Galicia subdesenvolvida".

Mentres, a filóloga Pilar García sinalou que a Xeración Nós "proclamou a maioría política de Galicia e exerceuna" defendendo o que chamou "o triplo V: voz, voto e veto".

Finalmente, o presidente do Partido Nacionalista Vasco, Andoni Ortuzar, centrou a súa intervención en reclamar que "ademais da vixencia" sobre os postulados do nacionalismo "haxa tamén futuro facendo un esforzo entre Euskadi e Cataluña e Galicia para fortalecer o espírito das súas respectivas identidades".

"Son pobos en construción que só poderán defender as súas ideas únense os seus esforzos", dixo.