Primeira reunión da mesa de traballo para a "urxente" reindustrialización de Ferrolterra, Eume e Ortegal

Representantes do Goberno central, da Xunta, dos concellos das comarcas de Ferrolterra, Eume e Ortegal, conxuntamente con integrantes de asociacións empresariais e sindicais protagonizaron na mañá deste martes, 9 de febreiro, de maneira telemática, a primeira reunión da mesa para a reinduistrialización e a reactivación económica de todo o norte da provincia da Coruña.

Ao termino do encontro, a subdelegada do Goberno na Coruña, Pilar López-Rioboo, manifestou "o compromiso do Estado para a defensa do emprego e o desenvolvemento industrial da comarca ferrolá" e que trasladará aos diferentes ministerios as demandas e prioridades establecidas no seo da mesa de traballo.

A subdelegada ha considerou "fundamental e imprescindible conseguir unha unidade de acción e actuación por parte de todas as administracións, tanto as locais, como a autonómica como a estatal, xunto cos sindicatos e empresarios".

MÁIS IMPLICACIÓN

Pola súa banda, o delegado da Xunta na provincia da Coruña, Gonzalo Trenor, expresou "o compromiso do Goberno galego con toda a industria da comarca de Ferrolterra, Eume e Ortegal" e lamentou " a falta de implicación por parte do Goberno de España, aplicando unha política enerxética errática e contraditoria, por carecer de planificación industrial e por tomar decisións que favorecen conscientemente a outras zonas de España en detrimento de esta comarca".

Así, ha asegurando que resulta prioritario "dotar de carga de traballo a Navantia", e evitar o peche de Siemens Gamesa nas Somozas e que permaneza activa a central térmica de Endesa nas Pontes. Por parte do ámbito municipal, o alcalde de Ferrol, Ángel Mato (PSOE), manifestou que cre necesario "un plan de axudas concreto, de incentivos, para a implantación de empresas", ademais de buscar solucións "urxentes" á necesidade de carga de traballo que ten agora mesmo o sector naval.

Tamén, que se dean a coñecer que proxectos hai previstos, dentro dos fondos europeos de recuperación, no ámbito do tres comarcas. "A situación é urxente e as administracións con competencias teñen que dar respostas o máis axiña posible", detallou o rexedor ferrolán.

Por outra banda, o alcalde de San Sadurniño, Secundino García (BNG), comentou que "o papel da mesa non debe de ser o de redactar estudos, documentos ou informes; senón de establecer un calendario de reunións cos gobernos central e da Xunta para que se realice accións e prazos concretos para incidir nas demandas da comarca", ademais de solicitar que na devandita mesa estean tamén partidos políticos, "que son os que se encargan de gobernar", e que "sería suficiente a presenza dun alcalde en representación de cada partido".

O rexedor nacionalista tamén demandou que esta mesa "ten que ser un instrumento que represente os intereses da comarca e que exerza a presión ante os gobernos do Estado e da Xunta para cambiar a situación de emerxencia e actuar realmente".

PARTICIPANTES

Na reunión da mesa de traballo estiveron presentes, por parte do Goberno central, o director xeral de Industria e da Pequena e Mediana Empresa, a subdelegada do Goberno na Coruña e a xefa da área de Coordinación Interna da Dirección Xeral de Industria.

Por parte da Xunta, o delegado na provincia da Coruña e a directora xeral de Planificación Enerxética e Recursos Naturais. Das administracións locais, os alcaldes de Ferrol, As Pontes, Pontedeume, Cariño, Cedeira, Fene, San Sadurniño, Narón, A Capela, Valdoviño, Cerdido, Mugardos, As Somozas e Ortigueira.

Por parte dos empresarios representantes da Confederación de Empresarios de Ferrolterra, Eume e Ortegal, da Asociación de Empresarios de Ferrolterra e da Asociación de Novos Empresarios de Ferrolterra, así como representantes dos sindicatos CIG, CCOO e UGT.

Central térmica das Pontes (A Coruña). EUROPA PRESS - Arquivo