As residencias galegas reducen os novos contaxios a cero trala campaña de vacinación
O número global de infeccións continúa descendendo e sitúase en 105.
Por Europa Press / Redacción | SANTIAGO DE COMPOSTELA | 20/02/2021 | Actualizada ás 14:04
Unha semana despois de finalizar a campaña de vacinación na práctica totalidade das residencias de maiores de Galicia, o balance que fixo público este sábado a Xunta coa incidencia da pandemia nestes centros non suma ningún novo contaxio de covid-19 entre os usuarios, polo que o cómputo global continúa en descenso e colócase en 105.
Ademais, segundo consta na última actualización de datos, con cifras ata as 18,00 horas do venres, esta baixada é posible porque outros nove anciáns que viven en xeriátricos recibiron a alta. En concreto, curáronse seis na residencia Mi Casa de Ferrol, dúas no Fogar Santa María de Verín e un na residencia de Vilardevós.
No entanto, tamén se retiran da listaxe de positivos dous falecidos comunicados pola Consellería de Sanidade na noite do domingo: unha muller de 93 anos, usuaria do centro San José de Arzúa e outra, de 86, que procedía de O Casón de Moeche.
Deste xeito, o centro con máis usuarios contaxiados é a DomusVi Laraxe, que se mantén con 46, seguida da Mi Casa de Ferrol, que descendeu a 18 maiores coa enfermidade. Tras estas, están o xeriátrico La Milagrosa da Coruña, con sete; DomusVi Carballo, con cinco; e o Fogar Residencial Xardín Castro Lareira de Salceda de Caselas, con outro cinco. Con tres usuarios infectados están O Casón de Moeche e o Hogar Blanco Amor de Borborás. Con dous, a residencia de Carballeda de Valdeorras, DomusVi Larouco, a Quercus de Leiro, a de Viana do Bolo, a Mi Casa de Pazos de Borbén e a Vivenda Comunitaria Urzáiz de Vigo.
TRABALLADORES
Pola súa banda, os traballadores con covid-19 en residencias de maiores redúcense a 54, tras un contaxio no centro A nosa Señora das Virtudes de Pontedeume --o único que figura no parte deste sábado-- e sete altas: dous en Fogar Residencial de Cerdedo-Cotobade, un no xeriátrico de Ortigueira, outro en O Casón de Moeche, un na Mi Casa de Ferrol e un último na residencia 3ª Idade de Moledo.Por tanto, entre as residencias con máis persoal contaxiado destaca a DomusVi Laraxe, con nove casos.
CENTROS DE DISCAPACIDADE
En canto aos centros de atención á discapacidade (CAPD) de Galicia, os usuarios infectados descenderon en dous tras as altas rexistradas na residencia Aspanaes, nas Pontes de García Rodríguez. Así, este centro conta no balance deste sábado con catro casos activos de coronavirus, aos que hai que sumar os nove positivos de Pai Menni de Betanzos, sete en Juan Vidán Torres de Santiago e un na nosa Señora de Fátima e Cristo Rei de Crecente. Os traballadores dos CAPD con covid, con todo, mantéñense en oito: catro en Pai Menni, un en CAPD A Coruña, un en CAPD de Sarria, un en Aspanaes das Pontes e outro en DomusVi Bóveda.
