O PSdeG denuncia a "gravísima persecución sindical" contra o comité de Alu Ibérica

O portavoz parlamentario e secretario xeral do PSdeG, Gonzalo Caballero, denunciou a "gravísima persecución sindical" do Grupo Riesgo contra o presidente do comité de empresa de Alu Ibérica na Coruña ao tratar de despedilo.

Acompañado polo portavoz de Industria do PSdeG, Martín Seco, Gonzalo Caballero reuniuse este martes cos membros do comité de empresa da planta de Alu Ibérica na Coruña (antiga Alcoa) liderados por Juan Carlos López Corbacho, a quen o Grupo Riesgo anunciou o despedimento.

Tras o encontro cos traballadores, o secretario xeral do PSdeG denunciou a "persecución sindical" por parte deste grupo industrial como, na súa opinión, demostra o feito de que fosen anunciados os despedimentos de tres membros do comité de empresa da planta coruñesa.

"Atacando deste xeito os representantes dos traballadores atácase realmente a todos os traballadores, e non o podemos consentir", subliñou o dirixente socialista, que reclamou o compromiso do Grupo Riesgo para o mantemento da actividade industrial e do emprego na planta da Coruña.

Ademais, Gonzalo Caballero instou ás administracións a colaborar fronte a certas prácticas empresariais que considera que non son admisibles.