O Concello de Santiago reforza o seu veto aos pisos turísticos no Casco Vello

O pleno do Concello de Santiago deu luz verde á nova modificación do plan especial do centro histórico, no que se mantén a limitación ás vivendas de uso turístico na contorna da zona antigo. O paso dado na sesión plenaria este xoves corresponde á adaptación do texto refundido para adecuala aos distintos fallos xudiciais sobre a regulación deste tipo de vivendas na améndoa monumental.

Os cambios no plan especial foron debatidos no pleno que este xoves celebra o consistorio compostelán, onde PSOE e Compostela Aberta (grupo de goberno cando se iniciaron os pasos para limitar as vivendas de uso turístico) permitiron cos seus votos que a iniciativa saíse adiante. PP e BNG, pola súa banda, optaron pola abstención.

Como explicou a concelleira do executivo local Mercedes Rosón, a proposición aprobada este xoves corresponde ao texto refundido da modificación do plan especial na que se limitaban as vivendas de uso turístico na contorna do casco antigo, tras varios fallos xudiciais que tombaron o acordo. O último deles foi emitido o pasado 18 de xaneiro pola sección segunda do Tribunal Superior de Xustiza de Galicia, ante o recurso interposto pola Asociación de Vivendas Turísticas de Galicia (Aviturga) contra o acordo plenario do 15 de novembro de 2018, no que se aprobou definitivamente dita modificación.

Segundo explicou, o acordo aprobado suprimiu a compatibilidade dos usos hoteleiro e residencial comunitario nesas ordenanzas salvo excepcións e declarou a incompatibilidade do uso da vivenda para a citada actividade turística ou aloxamento temporal de curta estancia, é dicir, inferior a 30 días consecutivos.

No entanto, como incidiu Rosón na súa intervención, a sentenza recollía que a motivación detrás dos cambios introducidos na normativa urbanística perseguía antepor o "interese xeral" e que a súa anulación correspondía a irregularidades no proceso de exposición pública. Por iso, a edil socialista puxo o acento que o fallo "ampara", "máis aló da declaración formal", a modificación do plan, que pretende avanzar cara a unha cidade "equilibrada" na que se respecten "dereitos constitucionais básicos como a vivenda".

Pola súa banda, o concelleiro de Compostela Aberta Jorge Duarte (responsable da área de urbanismo no anterior mandato) apelou a "dar un paso máis" cara á limitación dos pisos turísticos no centro histórico para "priorizar o uso residencial". Segundo subliñou, a crise do covid e o seu impacto sobre o turismo "encheu de anuncios" as páxinas de procura de vivenda con ofertas "alcanzables" de pisos no centro histórico, o que para Duarte é unha mostra de que regular o uso turístico na zona vella é a vía para recuperar poboación na améndoa monumental.

PP E BNG RECELAN DA SEGURIDADE XURÍDICA

Os grupos que non prestaron o seu apoio á proposición, PP e BNG, mostraron os seus receos sobre a posible inseguridade xurídica desta modificación do plan especial. Para o portavoz popular, Alejandro Sánchez Brunete, os cambios supoñen unha "involución desde o punto de vista urbanístico" que achega "unha solución ambigua que abre a porta á insteguridad xurídica e a posibles demandas". "Despídome de vostede ata a próxima sentenza", apostilou o edil do PP no peche da súa intervención.

A responsable do grupo do BNG na corporación santiaguesa, Goretti Sanmartín, tambien expresou as súas dúbidas sobre a modificación dunha cuestión, a existencia de vivendas turísticas no centro histórico, que pide abordar con amplitude, xa que considera que non se pode responsabilizar de forma exclusiva a este asunto do "baleirado" de poboación da zona vella.

AXUDAS AO SECTOR CULTURAL

Por outra banda, o pleno deste xoves da corporación compostelá tamén aprobou unha iniciativa do BNG que propón ampliar as bases de convocatoria das axudas ao sector cultural para que poidan optar empresas e creadores que desenvolvan a súa actividade no concello aínda que a súa sede legal non estea en Santiago.

En concreto, a proposición, aprobada co apoio de Compostela Aberta e BNG, e a abstención de PSOE e PP; expón que se amplíe as bases para evitar que queden fondos sen gastar do plan de axudas dotado con 300.000 euros impulsado polo goberno local a mediados do mes de decembro.

Sanmartín advertiu que, a tenor das solicitudes presentadas, algunhas delas denegadas "por diversos motivos"; "en torno ao 50%" do orzamento quedará sen executar "a diferenza" dos plans de apoio municipais a sectores como o comercio e a hostalaría.

Rúa do Franco, o pasado nadal | Fonte: arquivo