Galaxia lanza a colección 'Memoria histórica', que chegará ás librarías a próxima semana

A Editorial Galaxia lanzou unha nova colección que chegará a próxima semana ás librarías coa publicación do libro 'Vermellos e Laicos', unha obra do historiador Narciso de Gabriel que arroxa luz sobre a depuración do profesorado laicista na Coruña por parte da represión franquista. Diso informou a editorial nun comunicado, no que explica que esta nova colección busca dar continuidade ao seu longo compromiso coa liberdade, defensa da democracia e galeguismo. Deste xeito, baixo esta serie publicaranse títulos que profundarán naqueles feitos que quedaron cubertos co manto da ditadura, tras década de silencio e falta de rigor ou xustiza histórica.

'Vermellos e laicos' conta a historia, a través dun profundo e detallado estudo, daqueles mestres e mestras republicanos que, atendendo á legalidade da Constitución de 1931 da Segunda República, apostaron por unha das medidas máis rupturistas da época: a educación laica. Nestas escolas, a simboloxía e moral relixiosa deu paso ao cultivo da tolerancia e cidadanía, atopando a oposición da Igrexa e, desde o principio da Guerra Civil, coa represión dos sublevados. Narciso de Gabriel pon datos e sucesos sobre o papel para facer xustiza e render homenaxe a todos os que caeron por "vermellos e laicos", con penas que foron desde a sanción administrativa ata o asasinato.

A obra, que contou coa colaboración do Concello da Coruña, engádese á traxectoria investigadora de Narciso de Gabriel, catedrático e Historia da Educación na Universidade da Coruña. Entre os seus últimos libros destacan 'Elisa e Marcela. Amigas e amantes' (2019) ou 'Xosé María Álvarez Blázquez, mestre republicano. Diario escolar e desterro' (2019), publicado tamén en Editorial Galaxia.

Vermellos e Laicos, de Narciso de Gabriel, inaugura a colección Memoria Histórica da Editorial Galaxia. EDITORIAL GALAXIA | Fonte: Europa Press