A EMA investiga catro eventos tromboembólicos graves tras administrarse a vacina de Janssen contra a covid-19
Nun dos casos, o paciente faleceu. Actualmente só se usa nos EEUU e espérase a súa próxima distribución na UE.
Por Europa Press / Redacción | Madrid | 09/04/2021 | Actualizada ás 16:41
A Axencia Europea do Medicamento (EMA, polas súas siglas en inglés) anunciou este venres que o Comité de Avaliación de Riscos de Farmacovixilancia (PRAC, polas súas siglas en ínguas) investiga catro eventos tromboembólicos graves despois de recibir a vacina contra a COVID-19 de Janssen.
Concretamente, notificáronse catro casos graves de coágulos sanguíneos inusuais con plaquetas baixas en sangue despois da vacinación. Un caso ocorreu nun ensaio clínico e tres casos ocorreron durante o lanzamento da vacina nos EEUU. Nun dos casos, o paciente faleceu.
Segundo o informe do 6 ao 9 de abril publicado polo PRAC, comezouse unha revisión para avaliar informes de eventos tromboembólicos -formación de coágulos sanguíneos que provocan a obstrución dun vaso- en persoas que recibiron a vacina COVID-19 de Janssen. "Estes informes apuntan a un "sinal de seguridade", pero "actualmente non está claro se existe unha asociación causal entre a vacinación con COVID-19 Vaccine Janssen e estas afeccións", afirma.
"O PRAC está a investigar estes casos e decidirá se pode ser necesaria unha acción reguladora, que xeralmente consiste nunha actualización da información do produto", sinala a EMA, que comunicará con máis detalle toda a información dispoñible unha vez que conclúa a avaliación.
A vacina COVID-19 Janssen actualmente só se usa nos EEUU, baixo unha autorización de uso de emerxencia, e espérase a súa próxima distribución na UE, xa que foi autorizada na UE o 11 de marzo de 2021. O lanzamento da vacina aínda non comezou en ningún Estado membro da UE, pero agárdase para as próximas semanas.
