O 091 atendeu máis de 4,5 millóns de chamadas en 2024

A Policía Nacional atendeu durante o ano 2024 máis de 4,5 millóns de chamadas ao teléfono 091 nas salas Cimacc (Centros Intelixentes de Mando Comunicación e Control) de toda España.

Concretamente, durante o ano 2024 as salas Cimacc de toda España recibiron un total de 4.593.376 chamadas, das que 1.709.723 foron peticións de información, mentres que 145.837 tiveron a súa orixe nunha demanda de carácter eminentemente asistencial, explicou a Policía Nacional nun comunicado.

As salas Cimacc prestan o seu servizo á cidadanía de maneira continúa as 24 horas do día os 7 días da semana chamando ao 091, recibindo unha media de 12.585 chamadas ao día. A este número pódese chamar en casos de situación de emerxencia ou demandas de información por parte da cidadanía.

Desde o momento que calquera persoa marca o 091, en cinco segundos como máximo, un operador atende a súa demanda. En caso de emerxencia, os axentes solicitarán unha serie de datos esenciais como localización do suceso ou a persoa. En pouco menos de cinco minutos, a cidadanía conta con presenza policial na localización precisada.

MADRID, CASE 900.000 CHAMADAS EN 2024

A Xefatura Superior de Policía de Madrid con case 900.000 chamadas, segundo os datos de Policía, foi a sala que máis chamadas rexistrou en toda España. Nesta sala o maior número de sucesos rexístranse os venres, chegando a atender unha media de 2.600 chamadas.

O 091, como número de atención telefónica da Policía Nacional, instaurouse inicialmente en Madrid en 1958 para facelo posteriormente en Barcelona e xa en 1960 implantarse en toda España.

Coche patrulla do 091 fronte á Peregrina, en Pontevedra | Fonte: POLICÍA NACIONAL - Arquivo