Nais e pais denuncian a "aberrante" falta de servizos para crianzas e embarazadas no rural

As loitas pola recuperación dunha sanidade pública presencial e polo "emprego de calidade" para os profesionais sanitarios están resoando en toda Galicia. Dende a Asociación Pediatras e Matronas Xa, conformada por un grupo de nais e pais "en defensa da sanidade pública de calidade para as crianzas e as mulleres embarazadas en Galicia", poñen o foco en concreto na "deixadez" da administración pública á hora de atender estes dous colectivos vulnerables, onde é "aberrante" a falta de servizos. Unha "deixadez" que provoca que "as crianzas dun pobo non teñan pediatra e sexan atendidas polo médico de familia, que como moito, fixo un curso de puericultura; ou que as mulleres embarazadas teñan que ser atendidas en hospitais de referencia que poden estar a unha hora de camiño", explica ao teléfono a portavoz da asociación, Vanessa Viquendi. 

Trátase, indica, de "carencias estruturais" que derivan dunha "falta de previsión" por parte da Xunta de Galicia: "Non se pediron novas prazas MIR e non se loitou por cambiar as taxas de reposición. Se non hai pediatras é porque non se quitan prazas para eles, que no canto de ampliarse fóronse reducindo", denuncia.

Esta situación, que afecta directamente á calidade asistencial na Atención Primaria, deriva nunha "merma do servizo" a través de horarios de atención limitados ou servizos inexistentes. "Matronas e pediatras están atendendo en diferentes centros de saúde, atenden só por horas ou un día á semana", denuncia a portavoz, que tamén pon o foco na importancia da variable xeográfica. "As cidades tamén notan estas carencias, pero no rural é moito máis bestia, desabastécese totalmente porque, ao final, os números son os que contan", fala. "Esta falta de servizos prexudica moitísimo o rural, a xente non se anima a vir. E a nivel educativo estamos na mesma", engade. 

Por todo isto, dende Pediatras e Matronas Xa animan a poboación a "formar parte desta iniciativa cidadá e asociarse á rede". "Xuntos e xuntas somos máis fortes para loitar e reclamar os nosos dereitos básicos", apelan á cidadanía galega. "Hai que manter os niveis de benestar nos pobos e aldeas. Para eles priman os números, para nós os nosos fillos. Aínda que é un camiño duro e unha carreira de fondo, manteremos a loita pola saúde das crianzas e das embarazadas ata que consigamos resultados", sentenza Viquendi. Pediatras e Matronas Xa pon a disposición das persoas interesadas en participar da iniciativa este formulario para formalizar as inscricións como socio.