Condenado a 11 anos de cárcere por agredir sexualmente e golpear á súa veciña en Tomiño
A Audiencia de Pontevedra considerou ao acusado autor dun delito de violación de morada, en concurso cun delito de agresión sexual e outro de lesións, co agravante do disfrace.
Por Europa Press / Redacción | VIGO | 25/05/2021 | Actualizada ás 18:04
A sección cuarta da Audiencia Provincial de Pontevedra condenou a 11 anos de cárcere a un home como autor dun delito de violación de morada, en concurso cun delito de agresión sexual e outro de lesións, tras enganar á súa veciña para entrar na súa casa, agredila sexualmente e golpearlle a cabeza repetidamente contra o chan.
O tribunal provincial considerou probado que, na madrugada do 8 de setembro de 2018, o acusado se presentou na casa dunha veciña, en Tomiño e chamou á porta facéndose pasar por unha muller para engañala e que lle abrise.
A vítima, crendo que chamaba a súa veciña e que necesitaba axuda, abriu a porta e, ao ver a un home coa cabeza cuberta por unha carapucha, a cara tapada e luvas, tratou de volver a pechala. Con todo, o acusado abalanzouse sobre ela e agarrouna con forza polos brazos.
Segundo a sentenza, o home tirouna ao chan e, a pesar da resistencia da muller, realizoulle tocamentos nos peitos e na vaxina, por baixo do pixama que levaba posto. A continuación, agarroulle a cabeza e golpeouna varias veces contra o chan, marchándose despois e deixándoa tirada e ferida.
RESTOS BIOLÓXICOS
A vítima, cuxo testemuño é convincente para a Audiencia, non puido identificar nese momento ao seu agresor, xa que non logrou quitarlle a carapucha, aínda que afirmou que sospeitaba do acusado (pola súa estatura e complexión), ao que coñecía porque vivía preto cos seus pais, e mesmo estivera realizando traballos de roza na súa leira.
O procesado, pola súa banda, negou os feitos na vista oral, e asegurou que esa noite non saíra de casa porque se atopaba mal (padece lupus), unha declaración que foi corroborada polos seus pais, que compareceron no xuízo como testemuñas.
DELITOS E CONDENA
Por todo isto, a Audiencia de Pontevedra considerou ao acusado autor dun delito de violación de morada, en concurso cun delito de agresión sexual e outro de lesións, e coa circunstancia agravante de disfrace.
Así, condenouno á pena de 11 anos de prisión e acordou imporlle a prohibición de comunicarse ou achegarse á muller durante un período de 5 anos tras a súa saída do cárcere. Tamén deberá indemnizala en 300 euros polas lesións.
