A Xunta escolleu unha fundación integrada por Bacardí para dar charlas contra o alcol nos institutos
O programa está orientado á rapazada de entre 11 e 18 anos. As Anpas galegas cuestionan a decisión: "no sector público hai profesionais que levan décadas desenvolvendo ese labor".
- Un de cada catro adolescentes galegos fai botellón e as mozas participan máis que os varóns
- O consumo de alcol sobe un 70% durante as fins de semana, segundo un estudo da USC
Por Galicia Confidencial | SANTIAGO DE COMPOSTELA | 08/06/2021 | Actualizada ás 21:45
A Xunta de Galicia asinou un convenio cunha fundación de bebidas alcólicas para desenvolver actividades en institutos galegos. O acordo, que vén de ser denunciado pola Confederación de Anpas Galegas, foi anunciado pola propia Consellería de Educación a comezos do pasado mes de maio, cando se fixo pública a colaboración do goberno galego e a Fundación Alcohol y Sociedad para “a prevención do consumo de alcohol entre o alumnado de secundaria”.
A problemática estaría en que, como denuncia as anpas galegas, a citada fundación está composta por diversas destilarías de marcas recoñecibles, como Pernod Ricard España ou a filial española de Barcardi. Esta selección non tardou en espertar as suspicacias da plataformas de nais e pais: “ou sexa, a consellaría de educación pretende que a formación sobre o consumo do alcohol para a xuventude galega sexa controlada por empresas dedicadas á produción, distribución e comercialización de bebidas alcohólicas”, pregúntanse.
Segundo subliñaron no seu momento dende a Xunta, o obxectivo do convenio coa asociación de espirituosos pasaría por lanzar un proxecto que comezaría a aplicarse neste presente curso 2020/2021 coa previsión de amplialo outros catro anos lectivos á totalidade de Galicia. O obxectivo pasaría por “difundir hábitos de vida saudables entre os máis novos”, en palabras do Concelleiro, “e evitar en todo o momento o consumo de alcol en menores de idade”, segundo Bosco Torremocha, número un da fundación.
EXPERTOS DO SECTOR PÚBLICO
Dende as Anpas non confían en que unha fundación conformada por empresas que subsisten da produción e venda de produtos alcólicos sexa o axente máis indicado para desenvolver este labor de concienciación. “En Galicia temos xa unha rede de profesionais [...] que levan anos desenvolvendo os programas do catálogo da carteira de servizos en materia de prevención da xunta de Galicia”, explican dende as Anpas.
“Pero é que ademais tamén dentro do sistema universitario galego, concretamente na USC, temos un nutrido grupo de profesionais que levan décadas traballando na prevención de adicións en xeral e do alcoholismo en particular”, subliñan antes de engadir que veñen de ser “recoñecidos internacionalmente polo seu traballo”.
De acordo coa Xunta de Galicia, o programa acordado con esta fundación abranguiría a rapaces de ESO, Bacharelato e FP de entre 12 e 18 anos. Estes pasarían a recibir formación "presencial ou en liña" impartida por "monitores expertos en ciencias sociais". O proxecto, artellado baixo o nome "Menores ni una Gota", conta tamén cunha segunda versión dirixido á rapazada da ESO e que estaría artellada a través dunha páxina web da autoría desta fundación escollida pola Xunta, postura que non acaba de convencer aos pais e nais implicados.
