A Xunta cualifica como "un éxito" a proba piloto do lecer nocturno e pide "paciencia" ao sector das verbenas
González Formoso pide normas "realistas" e acordes cos "recursos dos concellos"
Por Europa Press / Redacción | SANTIAGO DE COMPOSTELA | 14/06/2021 | Actualizada ás 13:15
O vicepresidente primeiro da Xunta, Alfonso Rueda, cualificou como "un éxito" a proba piloto do lecer nocturno que se levou a cabo este pasado fin de semana, e expresou a súa confianza en que o sector poida retomar a súa actividade o 1 de xullo.
A preguntas dos xornalistas durante un acto na Deputación da Coruña, Rueda trasladou a satisfacción dos profesionais da hostalaría, que coincidiron en que todo se desenvolveu "con normalidade", xa que os participantes tiveron o comportamento "que se esperaba e que era necesario para a proba piloto".
"Agora queda avaliar os resultados, se todo sae segundo o esperado, o 1 de xullo o lecer nocturno en Galicia poderá volver funcionar coas normas establecidas, e conforme avance o verán se mellora a situación sanitaria, esperamos ir rebaixando as medidas ata, oxalá nalgún momento, xa non só do lecer nocturno, senón de toda a hostalaría, chegar a un funcionamento como o de antes", sinalou o vicepresidente da Xunta.
Precisamente, con respecto á proba piloto do pasado fin de semana, o conselleiro de Sanidade, Julio García Comesaña, tras participar nun acto en Vigo, reiterou que "a experiencia foi boa" e o comportamento dos clientes "razoable, sen incidentes". Así, tras agradecer a colaboración do sector, precisou que "haberá que facer algún axuste técnico" relativo á monitorización 'en liña' da calidade do aire, aínda que insistiu en que, en termos xerais, a proba funcionou "ben".
"PACIENCIA" Aos SECTORES DAS VERBENAS
Por outra banda, Alfonso Rueda pediu "paciencia" aos sectores implicados na organización das verbenas, ante preguntas dos medios sobre as mobilizacións que preparan pola ausencia de actividades como a pirotecnia ou a iluminación na proba piloto do próximo 19 de xuño.
"Acordámonos dos sectores que necesitan retomar as súas actividades. Isto depende tamén dos concellos, se todo vai ben, non só as orquestras se verán beneficiadas. Pido paciencia, se isto vai arrincando todos os sectores o farán", afirmou o vicepresidente do goberno galego.
En referencia á responsabilidade dos concellos neste tema, o presidente da Deputación da Coruña, Valentín González Formoso, apuntou que os concellos teñen que "ser responsables dun sector que atende a miles de persoas" e incidiu en que "todos" deben "facer un esforzo para que este sector volva funcionar".
"Hai que ir dando pasos, sabemos que isto se vai a recuperar, os concellos pedimos que as normas se acorden connosco, aí teremos que facer un esforzo cara á cidadanía, para crear normas realistas cos recursos dos concellos", afirmou González Formoso.
