Suso de Toro: "España está destinada a ser un país de camareiros"
O escritor galego valora, xunto con David Rodríguez, o papel de Galicia na xeopolítica nacional e internacional. "Son pesimista con respecto a España", apunta.
- Ramón Máiz: "O federalismo leva á solidariedade interterritorial, non gusta do nacionalismo dos ricos”
- Por fin recollen a interesante historia da familia Baltar, que axudou a Murguía, Rosalía, Castelao ou Dieste
Por Galicia Confidencial | SANTIAGO DE COMPOSTELA | 17/06/2021 | Actualizada ás 09:00
Cita obrigada para os interesados no papel de Galicia no Estado español e a Península Ibérica. Os escritores galegos Suso de Toro e David Rodríguez, deseñador gráfico e escritor, conversarán sobre as relacións políticas, económicas e sociais que ten Galicia con España, con Portugal e coas institucións europea, na sexta e última entrega da primeira tempada de Referentes, proxecto audiovisual dixital da Área de Cultura da Deputación da Coruña e coordinado por Xurxo Couto.
A conversa en cuestión, que xa tivo lugar, será estreada o vindeiro xoves 17 de xuño ás 20:30h no Facebook e na canle de Youtube da Área de Cultura da Deputación da Coruña. "Eu coñecín bastante ben como funciona Madrid", asegura nun momento da conversa Suso de Toro, "achegueime bastante a ver como funcionaban os poderes do Estado e podo ter un coñecemento bastante cabal e por iso mesmo chega un momento no que digo aquí non hai nada que facer, hai que defender a casa".
"Son pesimista, respecto de España", continúa Suso de Toro, "creo que dentro de Europa está destinada a ser un país de camareiros e pagar o que debamos e vivir unha falsa alegría, unha borracheira de realidade". "E, dentro diso", expón, "creo que Galicia necesita ter poder político propio". "Os meus esforzos todos están adicados a fortalecer o meu país, coa cultura, coas ideas, coa economía co que poida", conclúe, "fortalecer Galicia, para fortalecérmonos o máis que poidamos".
Rodríguez, fundador do blogue O funambulista coxo en 2005, pola súa banda, analiza os distintos momentos que travesou a relación existente entre a sociedade galega e as sociedades que a rodean e defende que "se hai algo positivo para Galiza despois de todos estes anos na Unión Europea foi a desaparición da fronteira entre Galiza e Portugal" e lamenta que non se aproveitara a oportunidade para "facer políticas dende aquí, non pensadas dende Madrid" e permitir que esa conexión con Portugal axudara a mellorar as condicións materiais galegas, a acumulación de poboación, o PIB e outras cuestións obxectivas de potencia económica e política.
