Feijóo volve a atacar as medidas de Sánchez e o "indepedentismo" do BNG

O candidato á Presidencia do PPdeG, Alberto Núñez Feijóo, defendeu este martes que, fronte ao "non a todo" do BNG e o "si a todo a Pedro Sánchez" do PSdeG, só o seu partido "defende os intereses de Galicia", incidindo en que os populares teñen "un modelo económico, unha folla de ruta que seguir e o mellor equipo para alcanzar un obxectivo: que a Comunidade creza".

Durante a Xunta Directiva provincial do PP da Coruña, na que presentou o seu proxecto de cara ao 17º Congreso autonómico, lamentou que o modelo económico do BNG estea baseado en "negarse a todo: ao Xacobeo, a captar novos proxectos industriais e a apoiar aos que xa hai en Galicia, como ENCE; ás enerxías renovables, como a eólica, a eólica mariña ou a hidráulica; ou á construción militar en Ferrol".

"Se o seu modelo é o do independentismo vasco e catalán, o de Otegi e Junqueras, de fuga de empresas e perda de investimentos, os galegos temos claro que ese non é o noso", aseverou.

Pola súa banda, segundo recolle nun comunicado, cuestionou tamén que os socialistas galegos estean "de acordo con todo o que decide Sánchez, ata o punto de aceptar que baleire os estaleiros ferroláns, que non haxa estatuto lectrointensivo, que penalice a Galicia con 681 millóns de Fondos Covid menos do que nos correspondería e mesmo lles pareza ben o peche das centrais térmicas das Pontes e Meirama".

Feijóo entrega os avais na sede do PPdeG.. PPDEG