Denuncian que o Santander segue sen retirar os seus vertidos ilegais en zonas protexidas da Limia
O banco foi multado en 2020 por depositar residuos nunha zona protexida da antiga Lagoa de Antela. Amigos da Terra asegura que o lixo segue aí e que veñen de interpoñer unha nova denuncia.
- Cando o Franquismo fixo desaparecer a lagoa máis grande de Galicia
- Denuncian a falta de solucións para a contaminación do encoro de As Conchas, na Baixa Limia
Por Galicia Confidencial | SANTIAGO DE COMPOSTELA | 07/07/2021 | Actualizada ás 14:32
A lagoa de Antela volve acaparar titular a raíz dos vertidos ilegais que, en outubro do ano pasado, custaron unha multa de 10.000€ ao Banco Santander e a inmobiliaria Aliseda. As entidades foron sancionadas pola Confederación Hidrográfica Miño-Sil despois de que esta ditaminase que depositaron entullos de forma ilegal sobre zonas protexidas de distinta clase situadas na área da antiga Lagoa de Antela.
A problemática estaría en que, segundo denuncia Amigos da Terra, o lixo abandonado polo Santander e Aliseda segue no mesmo punto da antiga lagoa, desaparecida dende hai décadas despois de que o franquismo mandara secala para crear campos de cultivo. A asociación, que no seu momento foi unha das plataformas denunciantes do suceso, vén de anunciar que volverá levar o abandono dos entullos á Confederación Hidrográfica.
No seu momento, o organismo dependente do MITECO resolveu sancionar a ambas entidades por depositar este lixo sen darlle un tratamento apropiado. En particular, subliñan que os entullos depositados carecían de impermeabilización, razón pola cal poderían filtrar substancias ao chan --lixiviados, por exemplo-- e “poñer en perigo o dominio público hidráulico”.
ZONAS PROTEXIDAS
Acontece que, por riba, o depósito de lixo realizado por Aliseda e o Santander localízase nunha área da antiga lagoa que está protexida por partida dobre. O punto en concreto aproveitado por ambas entidades é á vez Zona de Especial Protección para Aves (ZEPA) e un Espazo Natural Protexido. Por todas estas cuestións, a CHMS decidiu sancionar con 10.000€ ás empresas, que tiveron que abonar de forma solidaria a contía.
Do mesmo xeito, a Confederación Hidrográfica Miño-Sil decidiu eximir do pagamento ao Concello de Sarreaus, que nun principio fora incluído tamén no expediente sancionador en cuestión. O Banco Santander obtivo no pasado 2020 un beneficio ordinario de 5.081 millóns de euros, segundo cifras ofrecidas pola propia entidade bancaria na súa páxina web.
