Os casos de miocardite e pericardite tras a vacina de Pfizer e Moderna son "moi raros", di a Axencia Europea do Medicamento
Os casos se produciron principalmente nos 14 días seguintes á vacinación.
Por Europa Press / Redacción | Madrid | 09/07/2021 | Actualizada ás 18:04
O Comité de Seguridade da Axencia Europea do Medicamento chegou á conclusión de que a miocardite e a pericardite poden producirse en casos "moi raros" tras ser vacinado contra a COVID-19 coas doses de Pfizer e Moderna.
Por tanto, o Comité recomenda incluír a miocardite e a pericardite como novos efectos secundarios na información do produto destas vacinas, xunto cunha advertencia para concienciar aos profesionais sanitarios e aos cidadáns europeos.
A miocarditie e a pericardite son afeccións inflamatorias do corazón. Os síntomas poden variar, pero a miúdo inclúen disnea, latexados fortes que poden ser irregulares (palpitacións) e dor no peito.
Para chegar á súa conclusión, o Comité realizou unha revisión en profundidade de 145 casos de miocardite no Espazo Económico Europeo (EEE) entre persoas que recibiron a vacina de Pfizer e 19 casos entre persoas que recibiron a de Moderna. O PRAC tamén revisou os 138 casos de pericardite tras o uso de Pfizer e 19 casos tras o uso de Moderna. En comparación, ata o 31 de maio de 2021 administráronse ao redor de 177 millóns de doses de Pfizer e 20 millóns de doses de Moderna no EEE. Ademais, o PRAC tamén examinou os casos recibidos en todo o mundo.
O Comité concluíu que os casos se produciron principalmente nos 14 días seguintes á vacinación, con maior frecuencia despois da segunda dose e en homes adultos novos. En cinco casos ocorridos en Europa, as persoas faleceron. Eran de idade avanzada ou tiñan enfermidades concomitantes.
Os datos dispoñibles suxiren que a evolución da miocardite e a pericardite despois da vacinación é "similar á evolución típica destas afeccións e adoita mellorar co repouso ou o tratamento".
A Axencia Europea do Medicamento (EMA, polas súas siglas en inglés) resalta que os profesionais sanitarios "deben estar atentos aos signos e síntomas da miocardite e a pericardite". "Deben dicir ás persoas que reciben estas vacinas que busquen atención médica inmediata se aparecen síntomas indicativos de miocardite ou pericardite", apuntan.
Por outra banda, a EMA establece que, polo momento, non se puido establecer unha relación causal coa miocardite ou a pericardite coas outras dúas vacinas autorizadas, a de Janssen e a de AstraZeneca. En calquera caso, o Comité solicitou datos adicionais ás empresas que comercializan estas vacinas.
A finais de maio de 2021, os casos de miocardie notificados no Espazo Económico Europeo a partir da base de datos EudraVigilance eran 38 para a vacina de AstraZeneca e ningún para Janssen. Os casos de pericardite foron 47 para a de AstraZeneca e unha para Janssen. En contraste, uns 40 millóns de europeos recibiron a vacina de AstraZeneca e dous millóns a de Janssen.
A pesar de todo, a EMA confirmou que "os beneficios de todas as vacinas autorizadas contra a COVID-19 seguen sendo maiores que os seus riscos, dado o risco de enfermidade e as complicacións relacionadas, e dado que as probas científicas demostran que reducen as mortes e as hospitalizacións por COVID-19".
