Investigadores galegos avanzan nun medicamento a base de equinácea para tratar a Covid-19

Investigadores do Hospital Clínico Universitario de Santiago e do Hospital do Barbanza forman parte do consorcio español que leva a cabo o ensaio clínico 'ECCO-2', dirixido a comprobar se un medicamento formulado coa planta equinácea purpúrea, utilizada no tratamento do arrefriado común, é tamén eficaz para tratar a Covid-19.

O doutor Jesús R.Requena, profesor bioquímico adscrito ao Centro Singular de Investigación en Medicina Molecular e Enfermidades Crónicas (Cimus) e á Universidade de Santiago de Compostela, é un dos promotores desta investigación, que conta co apoio do Instituto de Investigación Sanitaria de Santiago de Compostela e o Servizo Galego de Saúde, entre outras institucións.

Segundo informan o Cimus e o Instituto de Investigación Sanitaria de Santiago (IDIS) nun comunicado, un estudo levado a cabo por científicos suízos demostrou recentemente que os extractos de equinácea "teñen un efecto antiviral directo sobre o SARS-CoV-2, o virus causante da Covid-19".

"Tendo en conta este precedente, o consorcio español recibiu a autorización da Axencia Española do Medicamento e Produtos Sanitarios para iniciar o ensaio ECCO-2, que analizará a eficacia de Equinácea Arkocápsulas como tratamento coadyuvante para o coronavirus", explican os investigadores.

O obxectivo principal desta investigación, indicaron, "é demostrar a diminución de sintomatoloxía e a mellora da evolución da enfermidade en pacientes covid-19 positivo, ao pautar Equinácea Arkocápsulas xunto ao tratamento estándar".

A hipótese principal do estudo radica en que a 'Equinacea purpurea' podería ser efectiva "na redución dos días de enfermidade, o risco de ingreso e mesmo en mellorar a súa evolución, diminuíndo algunhas das complicacións posteriores asociadas á Covid-19 persistente".

"OPCIÓN FÁCIL DE USAR"

"Este tratamento podería ser unha opción fácil de usar, económica e accesible para axudar a tratar a enfermidade nas súas primeiras fases. Na actualidade, non dispomos de ningún tratamento para abordar a Covid19 ao principio da infección, todos están indicados cando a enfermidade avanzou moito", explicou o doutor Jesús R. Requena. "Pode constituír unha ferramenta máis para abordar unha enfermidade tan complexa e mortífera", engade o experto.

No ensaio clínico multicéntrico prospectivo, controlado, aleatorizado e dobre cego incluíronse pacientes con diagnóstico de Covid-19 positivo, objetivado por PCR ou test rápido de antíxenos, atendidos en Urxencias por facultativos ou MIR de hospitais de Aragón e o Hospital Clínico de Santiago de Compostela e o Hospital do Barbanza. Os pacientes serán seguidos nun período de catro semanas e os científicos esperan obter resultados definitivos antes de que acabe o ano.