Os xulgados de Santiago inauguran unha sala con "decoración especial" para menores e vítimas vulnerables
O obxectivo é que estas persoas poidan declarar en condicións de protección e privacidade.
Por E.P. | SANTIAGO DE COMPOSTELA | 07/09/2021 | Actualizada ás 18:14
Os xulgados de Santiago contan desde esta semana cunha nova sala especial habilitada para que presten declaración testemuñas menores de idade e vítimas especialmente vulnerables e protexidas. A sala Gesell instalada nos xulgados do compostelán barrio de Fontiñas permitirá que estas persoas poidan declarar en condicións de protección e privacidade.
O novo equipamento das dependencias xudiciais da capital galega foi visitado este martes polo vicepresidente primeiro da Xunta, Alfonso Rueda, que destacou tanto este investimento como a construción da sede do Imelga como mostra do "compromiso" do Goberno galego cos xulgados de Santiago.
A sala está dotada dun equipo informático, cámaras e micrófonos que permiten a gravación do sinal desde o habitáculo desde onde prestarán declaración estas testemuñas de características especiais.
Así, os xulgados de Santiago súmanse aos de Ourense e Lugo, que xa contan con salas deste tipo. Proximamente, Pontevedra e Vigo contarán tamén con estes espazos, destaca a Xunta, que se compromete a implantalas na Coruña e Ferrol.
En concreto, a Xunta resalta que a sala Gesell de Santiago dispón dunha "decoración agradable" onde a vítima estará acompañada por un psicólogo. Ademais, conta con outra zona de observación, onde xuíz, fiscal e letrados das partes poden interrogar ás testemuñas.
Ambos os espazos están conectados a través dun sistema de videoconferencia. Deste xeito, a testemuña non ten contacto visual coa outra zona para evitar que inflúa no seu testemuño.
O sinal da zona de exploración e observación pode redirixirse a outra sala do edificio xudicial ou, mesmo, a outro xulgado ou partido xudicial do ámbito da subdirección do Imelga que dispoña dun sistema de gravación de vistas coa firma dixital 'eFidelius'.
