Por Europa Press / Redacción | SANTIAGO DE COMPOSTELA | 14/09/2021 | Actualizada ás 16:26
Axentes do Parque Nacional das Illas Atlánticas denunciaron a dous mergulladores por realizar pesca submarina con fusil en augas da Illa de Ons e a Consellería de Medio Ambiente, Territorio e Vivenda abriulles un expediente.
Os feitos tiveron lugar en setembro, cando dous axentes avistaron unha embarcación con dúas persoas a bordo que se aproximaron á illa por punta Centolo, segundo detallou a Consellería. En concreto, unha destas persoas, que vestía un traxe de neopreno cun cinto de chumbo, comezou a realizar inmersións en distintos puntos da costa oeste, en punta Centolo, punta Xuvenco e punta Estripeiral. Mentres, o seu acompañante manexaba a lancha e prestáballe apoio.
Pola súa banda, os axentes constataron que estas persoas ocultaran o número de folio da embarcación coas defensas de protección e o seu nome para evitar a súa identificación. Finalmente, formularon unha denuncia que foi remitida ao servizo provincial de Pontevedra da Consellería de Medio Ambiente, Territorio e Vivenda.
Posteriormente, o servizo provincial dará curso ao servizo xurídicos para determinar a infracción cometida e a sanción que corresponde aos feitos denunciados. Así mesmo, comprobouse que estas persoas foron denunciadas por feitos similares este verán, o que levou que neste momento se tramite o correspondente expediente sancionador.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.